15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Pynyasoh kiwa kyrchaan u Kyrmen kam ki dkhot wa pura yong ka UDP Khliehriat Circle

Advertisement ad1

Shillong: Ka United Democratic Party (UDP) ynne ka sngi da yoh ko wow pdiang burom ya ki phaw ngut kiwa kyrchaan wei kamjooh kiwa kitkaam na ki seiñ saiñ pyrthai kiwa em hapoh ka jylla.

Ya kini kiwa kyrchaan wa kiwa kitkaam kiwa toh na East Jaiñtia Hills da pdiang sñiawbha wei da pynkup burom da u President ka UDP, u Metbah Lyngdoh ha ka yalang kawa man ha thaw sah yong u MLA ka Shella, u Balajied Synrem.

Kini kiwa da chah pynkup burom toh kiwa kyrchaan ya u MLA ka Khliehriat u Kyrmen Shylla ha ka Election wa da dep wei kiwa ym pu em pynskem kam ki dkhot wa pura wa kynthup leh kiwi won kiwa kitkaam na kiwi ki seiñ saiñ pyrthai.

Kini kiwa da wan pynyasoh kam ki dkhot wa thymme ka UDP Khliehriat Circle da em ki hadooh 32 ngut.

Hawa yaklam wa u Metbah, da ong wa i yoh wow yachem wa ki dkhot kiwa thymme em ko i dor wa khroo bha wei man ko kamwa e mynsien ya ka seiñ khamtam ha chwa wa ka seiñ u lehkmen ko yei dap 23 snem ha ka 11 tarik uni u u bnai.

“Kattu da man phi kiwa kitkaam wa ki wakreh ka Party, ym phær la wan phi na kiwon kiwon ki seiñ saiñ pyrthai tangwa kyrmen i wa u man phi kiwa kitkaam wa chit rhem ka Party,” ong u President rangbah ka UDP.

Neiliang u Metbah da ong u, “Kiwa yahkhmat rangbah ka UDP chim kyrpang ki ya phi kam ki bru rangbah neibhah wa hadien wa phi da nujor wei bichaar ya i krehkaam u MLA yong phi, da wan phi wow pynyasoh.”

U Metbah da ong u leh wa u MLA yong phi da leh u chiboon ki kaam tangwa em i tkoh wa i thut na i daw ka khlam COVID-19 hanla em kiwa ong wa u MLA yong phi dang khynnah u wa kiwi kiwi ki thooh daw, tangwa deiwa me kiwa thooh daw man ko kamwa e mynsien wow ya kreh bha.

Nalor ini, da ong wa ka Party sñiawkmen ki ya u MLA yong phi wei ha ki san snem wow wan daw hap wow kreh chooh chooh ym toh wow lehke.

U Metbah da e u leh ya i yaroh ya i angnood yong ki wow yarap lang ya kiwi ki Constituency ha Ri Loom Jaiñtia kiwa kynthup ya ka West wa East Jaiñtia Hills.

Ya ka yalang da pynlai da u General Secretary ka UDP u Jemino Mawthoh wa kiwa yahkhmat kiwa da e kyrmen kynthup ki ya u Bindo M Lanong uwa man uwa e buit ka UDP, u Vice President u Allantry Dkhar, ki arngut ki montri sorkar u Brolding Nongsiej, u Kyrmen Shylla wa u CEM ka KHADC u Titos Chyne wa kiwi kiwi.

Share this:
Previous

Maham ka BJP wow dam noh u kyrchaan yaka MDA lada ym takit yei baam tooh ha JHADC wa GHADC

Next

Da wai biang ya ka Malngkhona Out-Post