Ka Selection Committee ka JHADC kawa da chna ini wadep hapoh ka dorbar mang tyngka ka Council neibynta u chna pynbha pynmiat ya ka aiñ waheh chnong kawa tip kam ka ‘The Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015’, ynne ka sngi da hiar ko ha chnong Sohmynting, West Jaiñtia Hills District yow ap u sñiaw yei sur ki paidbah, neibhah wa ha kani ka chnong ha ki por nachwa yei kaam waheh chnong da jooh ksoh da ka kur Pyrtuh, katwa ha ki 3 Term wa da lai itæ nadooh u snem 2019, yei kaam waheh chnong da pynman da ka Election katkam ka aiñ 2015 ka JHADC deiwa yoh bynta wow yakhun næ wow jied leh da waroh ki jait kur wa em ha kani ka chnong.
Neiliang ka Selection Committee da wan wow mihkhmat da u M.B. Rymbai, Member Selection Committee uwa man leh u MDC ka JHADC chirup u Riswel Muruh uwa kreh hapoh ka Political Department ka JHADC.
Hadien i klam yahkhmat na u M.B. Rymbai hajrong i thmu wa wan yong oo ha kani ka sngi, napyrdi ki paidbah wa klam 4 ngut kiwa kyrchaan yeiwa jooh leh ha ki por nachwa itæ wow man waheh chnong da u bru ka kur Pyrtuh da pynyoo ki ya ki nia, katwa 10 ngut na kawi won ka liang da kyrchaan ki u pynman da ka Election kamwa da lai nadooh u snem 2019 katkam ka aiñ 2015 ka JHADC deiwa yoh bynta warohlang.
Ka liang kiwa kwah u man waheh chnong du ka kur Pyrtuh hawa klam ong ki, kamwa ka kur Pyrtuh toh kawa jooh chim yei synchaar khadar ha ki por nachwa yi u eh wow uiñ biang cha kitai ki por neibynta u pynneh pynsah yei sikai ki longchwa manchwa, kamwa da pynneh pynsah ya kiwi won ki dustur riti kam i e jait cha ka kynthai, i e pateiñ ya ka hok kynti haka khon khaddooh.
Ong haroh ki kamwa ya ka District Council da e bor lyngba ka Sixth Schedule wow pynneh pynsah ya ka khyndaw u chyiap, ka riti dustur wei kamwa kani ka chnong toh kawa em ya ka riti dustur, kani toh ka laad wow uiñ biang cha ka riti dustur wow pynskem yeiwa jooh pynmyllien nachwa.
Neitæ ong ki wa i jied deiwa pynman da ka Election ktah ko ya ka chongsuk chongsaaiñ ka chnong.
Katwa neiliang kiwa kyrchaan wow pynman da ka Election kamwa da lai nadooh u snem 2019, ong ki wa ka District Council em ko da u pood wow chna aiñ, tangwa ymtoh u pynkheiñ won ya ka Article 14 ka Constitution ka ri India, wei ki bru wa klam ye ki u klam tangwa emkaam u lai katkam ki kyndon wa biang.
Ong haroh ki wa ha ki le sien wa da yoh ki u chimbynta da ka Election man ko kawa suk wa saaiñ, tangwa i wan kani ka Commitee wanrah ko i ya sñiaw liang. Da kdaw haroh ki wa chwa u wan ka aiñ Waheh Chnong 2015 ka JHADC, yei kaam waheh chnong da jooh ksoh da u wym toh na ka kur Pyrtuh ha kani ka chnong.
Chooh chooh ka liang kiwa kyrchaan da ong ki wow pteiñ da ka Election neibhah ha ka kaam synchaar chnong ymtoh u wanrah da iwon iwon i sñiaw kur, i sñiaw niam næ kiwi won ki sñiaw, tangwa deiwa yoh bynta salonsar, wei kam kiwa chna aiñ wa da jied da ki paidbah lada toh ki MDC, MLA wa MP toh ki wow pait bichaar bniah wa ha kawon ka rukom u chna ya ka aiñ wa biang salonsar wei kawa yahaap katkam ka synchaar paidbah ka ri, neibhah lada paan na u paidbah waroh u yakhun ki cha jar jiar ka kur.
Da pynrap haroh ki deiwa ong, “Kat nang lai ki sngi ki por da nang lai nang ku i chaphrang haki liang waroh wow thooh yei che la heiyatoh i stat i tip wei wym hoi u uiñdien neiwa che cheiwa doom”.
Ka President VDP ka chnong Sohmynting kawa naka jait kur Kyndait da yieñ ko wow pynrem hajrong i pynbaad ka liang kur Pyrtuh wa kiwa rem da ka Election ym bien de ki u ya krehlang, heiwa ong ko wa ka em ko neiliang wa rem ha ka Election jied waheh chnong ini wadep tangwa ya ka da thung yei kaam wa hakhlieh dooh ka VDP ymtoh kamwa pynbaad ki wym em de i yakrehlang.
Da booh yukylli haroh ko wa hoi hi mo u yoobeiñ ya kiwi ki jait kur wot hawa ki leh man ki kiwa chong chnong pura kani hi ka chnong.
Hadien i pynyoo nia ki arliang, neiliang u M.B. Rymbai da pynkut u yaka yalang deiwa ong wa oo ym ye u wow chim rai neibhah wa ki paidbah wa wan ha kani ka sngi leh duna bha i katkam i em ki paaid wa chong chnong, ong u wa daw chong bichaar neini chakhmat khnang wa kiyi kiyi wa mut wa thmu leh u man deiwa yasuklang ki paidbah wa waroh ki jait kur wa em haka chnong Sohmynting.
Discussion about this post