Shillong: Ka Khun Hynñiewtrep National Awakening Movement (KHNAM) – State Youth Wing (SYW) da pynbaad ko wa i rukom thap kreh ym man i iwa bait ha ki kyrdan kreh kiwa lait ha ka yung krehkaam ka State Disaster Management Authority (SDMA).
Ha ka dorkhat cha u montri sorkar ka jylla wa pait ya ka Revenue and Disaster Management, u Kyrmen Shylla, ka KHNAM da dawa ko wow pyndam noh ya u Surojit Bordoloi wow man u kam u Consultant ka SDMA deiwa pynsñiaw wa ka jylla em ko ki khynroo khyllood kiwa biang wow kreh ya kani ka kaam.
Ka KHNAM da pynsñiaw ko leh wa i rukom pyntip paidbah (Advertisement) toh wow e cha ki khubor wow pyntikna wa ki khynroo khyllood wow tip ki ya ki kreh wa lait wa ye ki u yaleh.
Katkam ka RTI wa da e ka KHNAM da chem wa kawi ka Application na u Bordoloi da yoh pdiang katkam i pyntip paidbah neibynta i kreh Consultant ka SDMA yeiwa da pynmih ha ka 17-09-2013.
Hawa yaklam wa kiwa pathai khubor u President ka KHNAM – SYW, u Thomas Passah da ong u wa i pynpsiah pyrtuid ya u Bordoloi man i iwa tyngkheiñ ya ka kyndon ka State Reservation Policy kawa ong, “Hawa em ki kreh wa lait wa duna ya khynde tylli, ya kini toh u pynhaap ha ka thup kam kiwa da mang chwa neibynta ki jaitbru tre ri ya kiwa da bhah chwa katkam kani ka aiñ.”
Chooh chooh katkam ka RTI wa da sai madan da ka KHNAM da pynsñiaw wa ym em kiwa kreh kiwa da thung neh namo kiwa thung Contract ha ka yungkrehkaam ka SDMA.
Ha i jooh i por u Thomas da pyntip u wa ka thup yong ki kreh kiwa da mang tyngka neibynta ka SDMA dang sah thylli ki hadooh katni.
“I da klam i wa u montri ya kini kiwa emkaam waroh wei neiliang yong oo (Kyrmen Shylla) da kular u wow khut ya ki sahep yong oo wow yaklam katkam i chem kani ka RTI,” da ong u Thomas.
Discussion about this post