Jowai: Ki ar tylli ki seiñ ka East Jaiñtia Council wa ka Hynniewtrep Youth Council da li booh ki ya ka dorkhat ha u Member Secretary ka Meghalaya State Council Pollution Control Board ha kani ka 18 tarik wow pyrchah yei thmu ka Adhunik Cements LTD wow wai sa ka wi ka thaw tih moochuni ha Thangskai, East Jaiñtia Hills District.
Ha ka dorkhat da ong ki wa i rukom tih moochuni kawa da leh hei rukom Open Cast Mining da wanrah chwa ko yei pynjæd pynpra ya ka Bei Rymaw heiwa da klam che wa yow tih ya u moochuni toh du ha ki thaw wa sah chrah (Wasteland) tangwa kamwa man katni da tih ha ki thaw wa yoohun hi-eh ki karkhana pynmih khyndaw bilat.
Deiwa leh ki kamni ka la-ær da rah ko ya kiwa boon ki pum-pum kiwa da poi cha waroh ki chnong ki thaw heiwa kiwa chong chnong hap riñ mynsien ki ya kani ka la-ær. Sa iwi leh i tympdung ya ki dynamite da pynkhlot chkoor ki kiwa sah wa im cha kini ki thaiñ wei da ktah ko leh ya ka um dih ki bru kiwa da man bih lut.
Waroh ini da ktah ko leh ya i rep i riang ki bru kamjooh ya ki mrad khloo heiwa kam ki sim Assam Bamboo Partridge da sdang ki u wiar jait.
Ha kani ka dorkhat da ong leh wa da ktah i tih moochuni ya ki khloo kyntang ki jait bru neibhah ya kini ki khloo ym ye de u kyrriah cha iwi tawan i thaw.
Kamtæ ki kharkhana pynmih khyndaw bilat toh u burom ki ya i dustur riti wa kamjooh leh yei rukom im ki paidbah nadooh warim wajah.
Discussion about this post