Rah ka Jalaphet ya ka lympung yalehbol ka kur Dkhar

Ka lympung yalehbol yong ka sieñ kur Dkhar East Jaiñtia Hills District Sports Cultural Committee kawa tip kam ka 1^st 3 Days Football Tournament da poi ko chi wakut ynne ka sngi heiwa yei naam jop da yoh rah da ka Jalaphet deiwa jop ya ka Wapung 1-0.

Ha kani sngi da ya emlang leh wa ki waheh kur na ka seiñbei.

Chwa wow sdang ka yakhun Final da em ka yalang wa pynlai da u Shaniahskhem Dkhar uwa man leh kam u Chairman ka Sports & Cultural Committee SKDJHD. Da yoh leh i klam na u Tere Dkhar, President SKDJHD uwa da khana ya ki kaam yong ka kur heiwa da khana u leh wa ka kur Dkhar East Jaiñtia Hills District da dep thied ko ya i thaw wa heh kamwa 1000 Acre ha ka chnong Mokhep.

Da yoh leh i klam na u Waheh Chnong ka Mokhep, u Denis Siangshai uwa da ong wa emkaam wow ya khrehlang wa ka chnong wei da khana u leh wa daw e u leh ya ka NOC ya ka kur Dkhar wow chna ya ka yung Club ha chnong Mokhep wa em ki thaw yong ka kur.

Related posts

Super Division: Jop ka Shangpung Lumiawmuchai

November 20, 2024

Santosh Trophy 2024-25: Wot hadien wa chah thap 3-1 dang jop ka Meghalaya ya ka Arunachal

November 20, 2024

Da yoh leh i klam na u Harvist Dkhar uwa man kam uwa chah khut kyrpang uwa man leh kam u Vice President yong ka kur ha Jaiñtia Hills, uwa da yaroh ya ka kur Dkhar hapoh East Jaiñtia ya ki rukom khrehlaam yong ka kur.

Da yoh leh i klam na u Justine Dkhar, Ex-MLA uwa man leh kam uwa e buit ka Seiñ Kur Dkhar SKDJHD. Da e u leh i sneiñ i kyntu ya kiwa yalehke ka kur Dkhar waroh wa kamjooh ya kiwa wan paitke ha kani ka sngi.

Khaddooh da yoh yei klam na u Lakhon Dkhar, MDC Sohmynting Khliehtyrchi uwa man kam u kongsan ha kani ka sngi uwa da e ya ki ktien pynchlur ya kiwa yalehke wow man ki kiwa kohngooh, kiwa ryntih wei kiwa burom uwi ya uwi wei wow khreh chitom.

Da e u leh i yaroh ya kiwa kitkaam yong ka Sports Committee wa ye ki u pynlai bait pynlai ryntih ya kani ka Tournament. Da e sñiawbha u leh ya ka khunsnaam cha kiwa jop Final kamjooh ya kiwa rem.

Ynne ka sngi da pyman leh ya ki yakhun Semi Final heiwa ka Wapung da jop ko ya ka Khliehmyntriang da 1-0, ka Jalaphet da jop ko ya ka Iapmala Circle da 3-2 deiwa yachut Tiebreaker.

Neiliang ka kur Dkhar da e khublei kyrpang ko ya ka chnong Mokhep wa da e sñiawbha ko ya ka madan yow pynman ya kani ka lympung ha uni u snem.