Ka 11th Horace Sayoo Inter Group Football Tournament 2023 wa da pynman da ka Thangbuli Youth Social Welfare Club, Thangbuli kawa kyrchaan poisa da ka Yess Meghalaya dapoi ko cha wakut ynne ka sngi.
Kani ka lympung yalehbol toh kawa da yabhah ha ki ar bynta kitæ ka U-15 waka Open to All du neibynta kiwa chong chnong ka Thangbuli.
Ya kani ka lympung yalehbol da wan wow sakhi wei wow pynhaap pyrda da u MLA ka thaaiñ, u Lahkmen Rymbui kam u kongsan deilang wa u MDC ka thaaiñ u Saron Paswet kam u symbood kongsan deiwa emlang leh kiwi kiwa chah khut sñiawbha.
Ha ka Final ka U-15 da jop da ka Lion XI FC ya ka Black Panther FC da 1-0 lyngba ka kool wa thap u Pher I Mang Khyriem haka minit wa 15.
Yei naam Best Player da yoh da u Marshan Khyriem, i naam Best Goalkeeper da lai cha u Wily Suting katwa yei naam Top Scorer da yoh da u Abhahlang Khyriem.
Ha ka Open to All won da jop da ka Amtherong FC yaka Sualudong FC da 4-1.
Ya ki kool yong ka Amtherong da thap da u Skhem Langshiah haka minit wa 20, u Wantiewjune Buam haka minit wa 48 wa 56 wa u Thymmaibor Buam haka minit wa 70 katwa ya ka kool yong ka Sualudong da thap da u Ritikut Tariang haka minit wa 52.
Ha kani ka Open to All yei naam Best Player da lai cha u Thymmaibor Buam, i naam Best Goalkeeper da yoh u Marleki Tariang katwa yei naam Top Scorer da yoh u Wantiewjune Buam.
Ka Amtherong FC kam kawa jop da yoh ko ya ka song poisa kawa Rs. 13,000 deilang waka Trophy wa ki Medal katwa ka Sualudong FC da yoh ko yaka song poisa kawa Rs. 7000 ryngkat ka Trophy wa ki Medal.
Katwa ha ka U-15 da yoh ki da ki Trophy wa ki Medal.
Discussion about this post