Ka Mawlai SC da jop ko yaka lympung yalehbol yong ki kynthai iwa da man leh i sien wa ar kawa tip leh kam ka Women’s League 2023 wa pynman da ka Shillong Sports Association ha madan SSA Stadium ha First Ground, Polo ynne ka sngi.
Kam wow pynkynmoo wa ka Mawlai ynnin u snem leh da jop ko yaka sien wa nyngkong wa pynman ya kani ka Women’s League wei ha uni u snem da jop ko da 3-1 pyrchah yaka Laitkor SC hi wa yachem Final ki ha u snem wa dep.
Ya ka Mawlai da thap kool da ka Sunalinda Iawren (15′), ka Charlinda Nongtdu (40′) waka Ideibanri Kharpan (50′) katwa ya ka Laitkor da thap da ka Iawanlang Nongbet (36′).
Kiwa yalehke ka Mawlai da mih ki umkhmat wa kmen katwa ya kiwa yalehke ka Laitkor dei piah nood hadien wa da rem biang ha ka Final heiwa ha uni u snem da lehbha ki deiwa khlem rem chisien leh hadooh wa poi Final.
Ha kani ka sngi da wan wow sakhi kam ka kongsan da ka Director of Sports and Youth Affairs, ka Isawanda Laloo kawa da e kti leh ya ka Cheque wa T. 30,000 deilang waka Trophy cha ka Mawlai katwa ka Laitkor won da yoh ko T. 18,000.
Ka Priyanka Latam naka Lumparing SC da yoh ko yei naam Best Goalkeeper, ka Nisilia Majaw naka Laitkor da yoh ko yei naam Player of the Tournament katwa yei naam Player of the Final da yoh ka Sunalinda Iawren kawa na Mawlai.
Discussion about this post