Shillong: “Dei langær mih i kyntien wow pyndem wait wei wow yaklam yasuk da man kaamke hi-eh i,” da ong u Saiñkupar Nongtraw, General Secretary cum Publicity Secretary, ka HNLC lyngba ka wyrta wa phah u ynne ka sngi deiwa pynrap wa ym em chaniah ki ya ka sorkar Congress namo wot ya ka sorkar wa katni neibhah wa da pynjoor du i ktien wei lada klam sakhiat ko toh u thung ko da u ksiang (Interlocutor).
Da ong u wa i khut ka sorkar wow yaklam da pynartatien ko ya ka seiñ neibhah wa da ong ko wow pyndem wait chwa neitæ won wow yaklam yasuk deiwa ong wa da jooh chem ki ya ka sorkar ha ki por wa da lai wei ha ki san snem da booh ya ki hei langoh.
Da kylli u leh iyi u myntoi lada pyndem ki neibhah wa da kreh ki neibynta ka thong ka seiñ ha ki phaw snem wa dadep.
Da kyntu u ya u montri ka kaam pohyung wow yaklam wa ki seiñbhalang, ki heh yungmane, wa ki montri na Ynñiawtrep wa neiyi i daw wym khut yaklam kamwa da leh wa ka ANVC (Achik National Volunteer council) neibhah ini pynyoo yeiwa chah chiliang.
Ka seiñ HNLC da rai ko wow yaklam wa ka sorkar jylla wa ka sorkar pyrdi wow poi noh cheiwa suk neibhah wa da boon ki mynsien wa da dooh wei i pynyoo bor ye ki wow pyndooh du dei yaklam yasuk donhi.
Chooh chooh da ong u wa ka sorkar ym em u chimkhia ko yeini wei ka seiñ ymbien ko wow pyndem deiwa kyrchaan leh ya ki seiñ kiwa yaleh u khang yei wan chong chnong ki baar jylla.
Da maham u leh wow tynyap ya ki baar jylla neibhah wa da sdang boon ki hapoh ka ri-loom Khasi Jaiñtia neibhah i kyntien yasuk toh i wym kwah ka sorkar kawa kwah du u ya awri donhi.
Da pynkut u deiwa ong wa kattu chong i ha ka sorkar lada kwah ko i yasuk namo wow kai snaam.
Discussion about this post