August 1, 2022
Ka Khasi Hills Autonomous District Council (KHADC) da rai ko wow pyrchah yei thmu ka sorkar wow pynkrehkaam noh ya ka Civil Procedure Code (CPC) wa ka Criminal Procedure Code (CrPC) ha waroh kawi ka jylla.
U Chief Executive Member ka KHADC, u Titosstarwell Chyne da khut yalang u ynne ka sngi ya ki MDC, heiwa da emlang ki muktiar wa uwa bichaar ka kasari (District Council Court), wei ha kani ka yalang da chim ya i rai wow pyrchah ya ini i thmu ka sorkar.
Advertisement
U CEM da ong u wa lada pynkrehkaam ya ka CPC wa ka CrPC khlem pep ki kasari ki District Council leh u tlot bor noh ki, wei ha kani ka yalang da yoh wow pynche kammon u ktah lada pynkrehkaam ya ka CrPC wa CPC.
Da ong u wa ha ka Thohdieñ wa dadep, neiliang ka sorkar lyngba u Commissioner Secretary ka DCA, da rai ko wow pait bniah biang ya ini i pynbna, wei daw pynkhreh ko ya ka i thoh thymme namo ka ‘Draft Notification’, wei wow phah won cha ka Council ka wow pynsñiaw hajrong ini i thmu.
U Titos da ong u wa ki MDC da pynsñiaw ki yei sñiawkhia wa joor hajrong ini i kaam lada ktah ko ya i bor ka Council, wei da iwi i rai daw phah cha ka sorkar ki bynta wow ktah yei bor ka District Council.
Heijooh i por da pyntip u yei pyrchah ya ka Indian Limitation Act, neibhah daw ktah ko ya i rukom mantre ya i khyndaw i chyiap ka ri, neibhah lada pynkrehkaam ya kani ka aiñ, u bru wa da chong wai palat 12 snem ye u wow mantre noh ya i thaw.
Advertisement
