Jowai: Ynne ka sngi hadien wa da hiar ki pulit ka Assam cha Psiar toh neidaw wa yoo ki wa em ki pulit ka Meghalaya kiwa sah ha kani ka chnong kawa haap ha Block-I kawa man ka chnong wa ya kajia pood hapyrdi ka Assam wa ka Meghalaya.
Hei yaklam wa u DC ka District u Dykes LNS Garod da ong u wa ha ka 13 tarik uni u bnai hadien wa ki pulit ka Assam thmu ki wow chna Border Out Post (BOP) ha Psiar da mih i yaklam heiwa da rai wa ym chna ki ya kani ka BOP wei ki pulit na waroh ar jylla u ran ki na Psiar.
Hadien wa ki pulit ka Meghalaya da neh bait ki ha Psiar, ynne ka sngi ki pulit ka Assam leh da wan hiar biang ki cha kani ka chnong wei mar heitæ da phah ya u Border Magistrate uwa man leh u BDO ka Laskein Block u F. Basan chirup wa u DSP ka District u D. Moksha.
Manda poi kini ki sahep ha kani ka thaw da yaklam heiwa da chim ya ka rai wa ki pulit ka Meghalaya leh u ran ki na Psiar heiwa nyngkong da thooh thaw wow sah ki ha Tihwieh tangwa neidaw wym em thaw sah iwa biang ha Tihwieh da rai noh wow sah kini ki puit ha Sahsniang weiwa ka chnong Sahsniang leh da rai ko wow e chipor ya iwi i yong Hall neibynta ki pulit ka jylla kiwa em chi Platoon.
Choh chooh u Garod da ong u wa i daw wow ran chadien na Psiar toh wow burom kylliang ya ka rai wa da chim ha ka 13 tarik uni u bnai.
Chooh chooh neiliang u SP ka Disttrict, u Lakador Syiem da ong u wa kini ki pulit u sah ki chipor ha Sahsniang wei ha kani ka tayaw wow wan daw chna noh ya ka thaw sah ha Tihwieh.
Heiyatoh wa i pynbaad wa chah pyndik ki paidbah wa ki khynnah skur ha ki pulit Assam ynne ka sngi, neiliang u Garod da ong u wa ympu ye u ong iwon iwon hajrong ini wei dang pynman ya ka takit hajrong ini waroh.
Discussion about this post