Ka Meghalaya da booh lang ya ka waka Gujarat, Madhya Pradesh wa Kerala ha Elite Group A ka Ranji Trophy iwa dang dep pynkylla wei da pynbna da u BCCI Secretary, u Jay Shah.
Ini toh i sien wa nyngkong wa ka Meghalaya daw chimbynta ko ha ka Elite Group. Ka Ranji Trophy ym em de da pynman ya ka hapoh ka ri nadooh ki bnai wa sdang u 2020 neidaw wa wan ka khlam COVID-19. Ha ka samoi wa khaddooh, ka Meghalaya da jop ko 5 sien na ki 9 tylli deiwa rem 3 sien.
Ka Ranji Trophy da man ko leh kam ka yalehke Cricket First-Class hapoh ka ri, wei da toh u sdang ko ha u bnai wa dep tangwa neidaw wa wan ka la-ær wa le ka khlam, ka BCCI da pynbna ko wow sdang nadooh ka 10 tarik chwa wow pynbait ya ki yalehke wow pynman.
Ka Meghalaya daw pynman ko ya ki yalehke yong ha Rajkot, Gujarat.
Da em 8 tylli ki liang ha kawi ka Plate Group. Waroh da em 38 tylli ki liang wa da chimbynta wei da yabhah rap boon tylli ki Plate Group ha uni u snem yow yait nei poor smat u khñiang khlam.
Kiwa poi chakhmat dooh ki 7 tylli ki liang daw psiah ki cha ka Quarter Final katwa kiwa cha tre wa kiwa poi chakhmat dooh daw yaleh ki ya ka Pre-Quarter Final chwa wow jied ya ki 8 tylli ki liang wa khaddooh.
Ka Group Stage u sdang ko nadooh ka 10 tarik uni u bnai hadooh ka 15 tarik u Wisu (Mar). Ka Ranji Trophy daw sangeh ko chipor neibynta ka Indian Premier League, chwa wow sdang ya ka Knockout Round kawa daw pynman nadooh u Naisan 30 tarik hadooh u Naiynru 26 tarik.
Kiwa yalehke ka Meghalaya daw pynbna ha kini ki sngi wow wan heiwa kiwa yalehke da pynman ki yei pynkhreh ha madan Polo neibynta kani ka samoi wow sahkynmoo ya ka jylla.
