U MP ka Rajya Sabha, u James Sangma hawa lai sakhi kam u kongsan ya ka sngi pynkut ka chaad ñiam Behdieñkhlam 2026 ka Seiñraij Mukhla ynne ka sngi deiwa emlang u Montri ka chnat i chait i khiah, u Wailadmiki Shylla uwa man leh u MLA ka thaaiñ chirup wa ki sahep sorkar, ki khlieh yahkhmat niam wa ki Seiñraij waphær waphær, da pynsñiaw u i sñiawngooh wei yaroh ya ki paaid ka Seiñraij Mukhla kamjooh kiwa chong chnong marjan hajrong i man jop kani ka Behdieñkhlam wa i ye yong ki u pynneh pynsah ya ka riti dustur.
Wei ong u leh kani toh lyngba i yakreh chitom deilang ka imlang ka sahlang.
Hawa kyruiñ won u cha ka dorkhat wa e kti da ka Seiñraij Mukhla hajrong i emkaam yong ka u pynku wei chna pynbha pynmiat chooh chooh ya ki soodong sookun ka Aitnar kawa man ka thaw wa pyndep ya ka Behdeiñkhlam man-u-snem ha chirup i wan sakhi u paidbah wa boon walang na kylleiñ, u James Sangma da kular u wow e Rs. 20 lak neibynta u yarap yei thmu ka Seiñraij Mukhla.
Ong haroh u kamwa ya ka Behdeiñkhlam da sdang ha ka yurim u beh yei khlam, i kjut chitom wa i sih wa boonjait ha ka imlang sahlang, katni da wanrah ko yei man yatylli kawi haka imlang sahlang, wei man ki leh ka bor wa ye u pynjem yei eh haka imlang sahlang.
Kyntu haroh u ya ki khynroo khyllood wow sumaar wei yada ya ka riti dustur, kawa man ka dak wa i tynre i manbru khnang wa kani ka dustur u pteiñ ko cha ki pateiñ wow wan.
Chwa ini, u Wailadmiki Shylla da pdiang burom u ya waroh kiwa wan sakhi ya kani ka Behdeiñkhlam khamtam ya u kongsan, da e haroh u ki kyntien kyrkhu kyrdoh wa kani ka Behdeiñkhlam u wanrah ko i kyrkhu ha ki liang waroh nadooh i chait i khiah, i kamai kajih wa kiwi.
Ha kani ka sngi pynkut ya ka Behdeiñkhlam hapoh ka Syiem Aitnar, ki khon ka Seiñraij Mukhla ha deilang i chaad kmen i kyriaw wa ki sur ka bom ka bhuri da pynpoi ki ya ki rot ki rong hapoh Aitnar deilang ki khubor cha ka imlang sahlang.
Discussion about this post