Ka sorkar jylla lyngba ka chnat Social Welfare da pynlait ko ya ka bhah wa ar ka poisa (Second Instalment) cha ka Mawlai Town Dorbar (MTD) kam wow kyrchaan ya ka chnong Mawlai waroh kawi neibynta wow yakhun pyrchah yei drugs.
Ynne ka sngi neiliang kiwa yahkhmat chnong ka Mawlai da yachem ki ya u Montri ka chnat Social Welfare ka jylla, u Paul Lyngdoh yow ya syllok hajrong i lai luti wow yakhun pyrchah yei drugs.
Hawa klam hadien ka yalang, u Paul da khana u wa ha ka sien wa nyngkong neiliang ka sorkar da e ko yei yarap wa Rs. 6 lak cha ka MTD wei ynne ka sngi da e palat Rs. 15 lak. Da ong u wa ini i yarap man ko yow kyrchaan ya ka Mawlai Town Dorbar yei yaleh pyrchah yei drugs, wei da pyntip u wa ka MTD da ye ko wow leh deiwa booh boon ki thaw sumaar wei hadooh 30 ngut kiwa da chah kdoh chah khoom hei dih drugs da yoh ya syllok ki wei da pynbiang ki leh yei thaw baam wei thaw sah najrong wow sumaar wei e dawai.
Da ong u wa ka sorkar lyngba ka DREAM (Drug Reduction Elimination and Action Mission) da khut chooh chooh ko ya kiwi ki dorbar chnong wow wan chakhmat yow kreh lang waka sorkar khamtam yow pynyoh yei thaw neibynta wow chna ya ki thaw sumaar, heiwa da khana u leh wa neiliang ka Mawlai Town Dorbar da dep ko wow tyrwa yei thaw neibynta wow chna ya ki thaw sumaar ya kiwa dih drugs.
Discussion about this post