Da man ka sngi wa sahkynmoo ya kiwa chong chnong ka Reserve Gittim ha West Garo Hills heiwa u Montri Rangbah, u Conrad Sangma da saam u da ki Pata thaw cha ki 100 tylli ki manyung deiwa sakhi lang u Swapnil Tembe, DC, West Garo Hills wa ka Rikse R Marak, CEO, Tura Development Board wa kiwi kiwi.
Ha ka 19 tarik u Naikhynde 2018, da phah ya ka dorkhat cha u Montri Rangbah yow paan yarap hajrong i eh wa kini kiwa chong chnong da maad ki. Kamtæ ynnin ka sngi neiliang u Montri Rangbah ka jylla da saam u ya ki Pata cha ki 100 tylli ki manyung wa toh hok u yoh ya kini ki Pata thaw katkam wa da paan wei dawa yow man noh kam ki tre thaw.
U Conrad da ong u wa, “I man tre toh wow tipmit leh ya kiwa chong chnong ka jylla. Na ini i daw i pynman tre thaw toh kawa hakhmat dooh. Hei lai luti yong i ha ki soo snem katni toh wow yarap katwa ye i bor yow pynyoh ya ki bru ha Reserve Gittim wow yoh ki yei hok kam kiwa chong chnong ka Meghalaya. Wei u lai i chakhmat wow yarap ya kiwa chong chnong ka jylla kiwa maad ya ini i jooh i eh.”
Neiliang u DC da ong u wa i chong neh chi thaw toh iwa emkaam neibynta wow yoh ram, u wai ya ki Bank Account wa kiwi kiwi wa emkaam wow em ka Pata wa ki kot ki sla khnang wow ye u pynsakhiat yei chong neh ha i jooh i thaw. Da ong u leh wa em ki thaw ha Tura wa hei pait ki bor District kiwa ngat hei jooh i eh wei neiliang ka Revenue Branch dang thooh bniah ko kammon wow leh tangwa ynne da ye wow pynbiang deiwa yarap u Montri Rangbah.
Neiliang kawi na kiwa yoh Pata, ka Sharon D Sangma da ong ko wa ha u snem 2018, u CEM da sdang takit u hajrong i mantre, “Da maad i chiboon i eh neibhah wym biang ki kot ki sla wei wow pynsakhiat yei mantre yong i, wei ini da booh hei eh wow yoh u taan bordiñ, u taan umkor wa kiwi kiwi wa emkaam. Nga sñiawngooh O ya u CEM, u Montri Rangbah kiwa da yarap sakhiat ya i wow yoh Pata thaw kawa ym em da ye mutdur wow man sakhiat ynne ka sngi.”
Ka Remsoni Ch Marak da ong u wa heipor wa lai paan ram da chah kylli bait lada em Pata wei neidaw wym em i da chem chitom wow yoh ram tangwa kattu wa da yoh Pata daw man ko i kyrkhu ya i waroh.
