Jowai: Ka Public Accounts Committee (PAC) yong ka Meghalaya Legislative Assembly da kylli ko wa lada ka Committee on Special Purpose Vehicle (SPV) yong ka Lafarge Umiam Mining Private Limited (LUMPL) ym em pynlut ko ya ka poisa wa palat T. 200 klur neibynta wow wanrah ya ki kaam pynroi ha ki 53 tylli ki chnong hapoh Shella wa Mawsynram Constituency.
“Ka poisa wa da mang da sah hi-eh ko kawa da booh wow pynkreh ya ki kaam pynroi (welfare projects) ha i thaw wa heh 50 Sq Km kamwa da hukum da ka Supreme Court neiwa ka Lafarge tih moochuni ko ya uwa da chalan won cha Bangladesh,” da ong u Chairman ka PAC, u Charles Pyngrope hadien wa phah hajir ka PAC ya ki dkhot ka Committee on SPV ynne ka sngi ha Shillong.
Katkam wa ong u Pyngrope, ya kani ka Committee da chna hadien wa ka LUMPL da chah pynchitom ko ha ka yung bichaar wa khlieh dooh ka ri neidaw wa tyngkheiñ ko ya ki kyndon ka Ministry of Forest and Environment.
“Katkam i hukum ka SC da phah ya ka Lafarge wow su T. 90 na ka chi ton u moochuni wa tih ko wow chalan cha Bangladesh. Ha kini ki snem wa da lai ya kani ka poisa toh u pynkreh ha ki kaam pynroi kiwa kynthup nadooh i chait i khiah, puræ puthi, khayi pateiñ, ka kaam rep, wa kiwi kiwi kiwa em hapoh 50 Sq Km” da pynrap u Pyngrope.
Da ong wa katkam ki kot ki sla wa ki yukheiñ wa em, ka poisa wa da yoh da Committee nadooh u 2010-2011 hadooh u 2018-2019 toh T. 167 Klur wei kani ka Committee da yoh ko ya ka sut wa T. 34 klur na ki thaw wa da booh ya kani ka poisa.
Neiliang u dkhot ka PAC, u Himalaya Muktan Shangpliang da ong u wa da chimkhia ko wow pyntikna wa da pynkrehkaam yeini nadooh wa sdang ya ka ha u 2015-2016.
“Da sñiawkhia i yei rukom pynkrehkaam ya ki project neibynta ki bru samen hapoh ka SPV kam i rep kwai rep pathi, i psan sniang, syiar wa kiwi kiwi. Ya ka bynta wa ar namo ka Second Installment dang yang wow pynlait ya ka hanlada ya ka bynta wa nyngkong da pynlait la le snem nachwa” da ong u Shangpliang.
Neiliang ka PAC da ong ko ya ka Committee wa lada em i pynslem wow pynlait ya ka bynta wa ar daw yah i chei wiar kini ki project.
Heiyatoh wa ki project chna sarok da ka SPV, da ong u wa u sarok wa pynyabi ya ka Synnei wa kynjoh T. 5.5 klur wa uwi na Tynger cha Dewsaw uwa T. 13.5 klur da wiar ki na ka i thoh sarin namo ka list ha kani ka project.
Da ong u leh wa ki scheme saam umdih hapoh ka SPV neibynta ka Mawdon, Lawbah wa Mawkhan leh da wiar ki na kani ka list deiwa pynrap wa ka Committee da paan biang ko na ka sorkar wow booh biang ya kini ki scheme neibhah wa u Chief Secretary, T Tshering da kular u wow khut da ka yalang hajrong ini waroh.
Discussion about this post