U Montri wa pait yaka puræ puthi ha ka jylla, u Lahkmen Rymbui da ong u wa i wym ye u pyndep ya ki Residential School toh neidaw wa ka sorkar pyrdi ym pynlait poisa ko, tangwa neiliang ka sorkar jylla ka da chimkhia ko ya ini i kaam wei kammon wow pyndep ya i kaam.
Kam wow kdaw heini, kiwa yahkhmat ka Raid Mawtari Myrdon Sirdarship deilang wa kiwa yahkhmat yong ka Dorbar Chnong Mawtari Myrdon ha ka sngi wa ar da maham ki wow chimkti hi noh ya ka Residential School kawa da chah ieh chrah ha ka sorkar kawa em ha chnong Mawtari Myrdon khlem da pyndep nadooh wa da sdang chna ya ka ha u snem 2012.
U Rymbui da pyntip u wa ha u snem 2012-13 ka sorkar pyrdi da thmu ko wow chna 20 tylli ki Residential School hapoh ka Jylla, heiwa 19 tylli da dep wow sdang ya i kaam, tangwa da hap wow pynsangeh noh neibhah wa ka poisa man ko du T. 55 klur, wei na kani da pynlait poisa du kajiak, heiwa ym pu ye wow su wot ya ki Contractor kiwa da pynkreh ya i kaam.
Da ong u wow chna ya ka Residential School ha i lut T.5 klur kawi i wym ye neibhah emkaam boon wow chna, nadooh ki thaw sah ya kiwa sikai, ki Hostel wei kamjooh wow pynbiang ya ka um wa ka bordiñ. Da ong wa nadooh nachwa da dep wow klam che wow pyndep ya kini ki kaam, da emkaam sa palat T.10 klur kawi hadooh wow yoh sdang syndon ya ka skur.
