Shillong: Ka Federation of Person with Disabilities, ka seiñ yong ki bru kiwa em i duna kawa kynthup ya ka Meghalaya Deaf Association (MDA), Khasi Disabilities Association (KDA), All Meghalaya Association of Person with Disabilities (AMAPD), ka Meghalaya Liberation of Visually Impaired (MLVI) wa ka Garo Hills Association of the Deaf (GHAD) da pynsangeh noh chwa ya i thmu wow pynman da ka yakhih chong kylleiñ myngor, wa da thmu wow pynman ha ka 24 tarik wa 25 tarik uni u bnai.
Ini i pynsangeh noh ya ka yakhih da kini ki seiñ toh hadien wa ki da sñiawhun ki ya i kular na u montri ka Social Welfare, u Kyrmen Shylla ynne ka sngi.
Hawa yaklam wa ki laad pathai khubor hadien i yachem wa u montri, u President ka KDA, u Starwin Kharjana da ong u wa u montri da kular u wow chimkhia wow pyntikna wa ki bru kiwa duna ha i doh i pran u yoh bhah ki kaam ki kawa 4% kamwa da thoh ha ka aiñ The Rights of Persons with Disabilities Act, 2016. Ha i jooh i por da pyntip u wa u Kyrmen da kular u leh wow yaklam ya i dawa kiwa duna ha i doh i pran wa u montri rangbah, u Conrad K Sangma.
“Lada chim nadooh u snem 1995, kamwa man katni da em kamwa 500 ngut ki bru kiwa da pyndep ya ka kyrdan Matric cha neiñ kiwa duna ha i doh i pran wei ym pu yoh ki yaka kaam sorkar wei lada ka sorkar chimkhia ko, ym man iwa eh wow thap kreh ya ki waroh,” da ong u Kharjana.
Katkam wa pyntip u Kharjana da em du kamwa 80 ngut kiwa duna ha i doh i pran kiwa yoh kaam sorkar ha ka jylla waroh kawi.
“I da yoh i yaka kular na u Kyrmen wa daw phah u dei thoh cha ki District Selection Committee (DSC) wa cha ka Meghalaya Public Service Commission (MPSC) wow pynkrehkaam yaka bhah kaam kamwa da mang neibynta kiwa duna ha i doh i pran,” da ong chooh chooh u Kharjana wei da pyntip u leh wa da e yumut ya u montri wa toh u kheiñ ya i lait ki kaam man ka le snem khnang wa ki kaam wa lait u poi ki katkam ka yukheiñ wa mang bhah ya kiwa duna ha i doh i pran.
Discussion about this post