Ki wakreh yong ka GVK EMRI hapoh ka chatri yong ka Meghalaya EMRI Workers Union (MEMRIWU) ynne ka sngi da chim ki ya ka rai wow pynsangeh noh yei yakhih dam kreh yong ki.
Ya ini da leh hadien wa ka sorkar lyngba u Montri ka chnat i chait i khiah u James Sangma da phah u ya ka chithi cha ki ynnin i miet heipor kamwa 9:30.
“I da pait bniah i ya ka chithi wei da chem wa biang ko hanla ym em da pynhun ko 100% ya i, ya kawa i hun i du 70% wei kawa sah man ko sa 30%,” ong u Publicity Secretary ka MEMRIWU u Joseph Pyngrope hawa yaklam wa ki laad pathai khubor.
U Pyngrope da pyntip u leh wa i pynku ya ka tulop yong ki ym man ko kamwa kwah ki wei dang hap wow pynbait chooh chooh, “I dawa yong i ym toh wow yoh ka tulop wa malu mala neibhah kamwa man katni dang yoh i da iwa dang duna.”
Ka chithi da pynsñiaw ko leh wa ka sorkar ka dang pait wei bichaar bniah ko ya ki kaam ha wow pynlai ya i krehkaam ka 108 wei da kyrpaad wa i kaam toh u lai chakhmat khamtam ha i por yong kani ka khlam.
“I leh sñiaw wyrai i ya ki paidbah kiwa da chem jynjar deiwa sangeh krehkaam yong i, kamtæ i da chim i yei rai wow sangeh noh ya ka yakhih wei wow pteiñ ka chakri ya ki paidbah kiwa emkaam, i sangeh yakhih yong i ym mut wa da hun lut i, tangwa i smat i wow ya krehlang wa ka sorkar khnang wa i kaam u lai i chakhmat,” da pynrap u Pyngrope.
Chooh chooh da pyntip u wa i ya krehkaam biang yong ka 108 daw sdang heipor 7 waje i miet ynne ka sngi ha nongbah Shillong katwa cha kiwi won ki thaw u kreh biang manda ki kari 108 u poi ki cha thaw krehkaam yong ki.
“Kamwa man, ka sorkar ym kwah ko wow em i yakhih tangwa toh u pynkrehkaam ya kiwa da dawa i, ym toh kajiak chisien wei ha ki por wow wan toh u chimkhia bha neibhah i ya kdoh soskular wa ka GVK u kut noh ha ka 31-03-22,” ong u Pyngrope.
Da ong u leh wa ka sorkar ym toh u ya soi soskular ko wa ki Company kiwa na baar neibhah ym sñiawthooh ya i rukom krehkaam wa i eh wa ki paidbah maad ki wei toh ki tre chnong kiwa sñiawthooh wei tip kammon wow pyndap pynbiang ya i emkaam yong i.