Ka seiñ Jaiñtia Students’ Union (JSU) seiñbei kam kawa da chim ya ka luti wow sdang pynman yakhih hajrong i dooh thaw puræ Class-XI da ki spah ngut ki khynnah ka Ri-loom Jaiñtia, kiwa da chaniah bait du ha ki skur sorkar neidaw wym yoh laad cha ki skur yong ki bru samen.
Neiliang ka seiñ ynne ka sngi da chim ko ya ka rai wow sangeh noh yei yakhih chipor hadien wa ka District School Education Officer Jowai, West Jaiñtia Hills District da tyrwa ko cha ka sorkar wow sdang noh ya ka Class-XI sa dei janmiet ha Kiang Nangbah Govt. Higher Secondary School, Jowai khnang wa ki khynnah wym pu em yoh thaw puræ ha ki skur sorkar yoh ki u lai.
Hei yachem ka JSU wa ka DSEO, da kular ko ya ki wow pynyoh thaw puræ lut ya waroh ki khynnah wa dadep e pyrtuid cha ka.
Ka DSEO da e ko leh cha ka seiñ dei thoh wa da phah ko cha ka sorkar hajrong i emkaam u sdang noh ya ka Evening Batch ha Kiang Nangbah Govt. Higher Secondary School.
Discussion about this post