Kamwa jooh man ha ki snem wa da lai, ha uni u snem leh ki bor pait bor pynlai ka District Association yong ka Meghalaya Bharat Scouts & Guides, West Jaiñtia Hills da pynman ko ya ka 9th Winter Annual Camp & Youth Leadership Training ha David & Lois Rees Memorial Secondary School, Tongkiad Iooksi.
Ka thong yong i pynman ya kani ka Camp toh chibynta wow yoh laad ki khynnah Scouts wa Guides u yachemlang chisien chisnem wei wow pynjanai ki leh yei tip i chemphang yong ki lyngba ki rukom sikai waphær wa kynthup nadooh i rukom kdoh tylle (Knoting & Lashing), i chna ya ki thaw booh tiar da ki siej ki dieñ (Gadgets) wa kiwi kiwa man katkam ka rukom dustur yong ka Scouts & Guides Movement.
Ha uni u snem ya kani ka Camp da sdang nadooh ka 5 tarik uni u bnai wei daw kut ha ka 9 tarik uni hi u bnai deiwa wan ki khynnah skur na ki Unit waphær yong ka District wow yachimbynta dei synranlang ki Scouts Master wa ki Guide Captain.
Ha ka yalang yahkhmat yong i wai ya kani ka 9th Winter Annual Camp & Youth Leadership Training hei pynlai u Carefully Gassah, DOC (S) MBS&G-WJHD da yoh i klam pdiang burom na ka Dolly Lamare, Guide Captain Jowai Open Unit neitæ i klam yahkhmat hajrong ka thong wei thmu yong ka kani ka Camp da u Pet Dhar, Jt. District Secretary, MBS&G-WJHD katwa u Adiam U Bthuh, District Secretary MBS&G-WJHD hei pynkut da e u ki kyntien khublei.
Ya kani ka 9th Winter Annual Camp & Youth Leadership Training da wan wow wai da ka Saramai Tariang, Vice-President, MBS&G hei emlang leh u Richard B Uriah, Principal North Liberty Hr. Secondary School, Jowai kam u symbood kongsan hei sakhilang ki khynnah skur wa kiwa sikai ka David & Lois Rees Memorial Secondary School, Tongkiad Iooksi.
Ka Saramai Tariang hei klam kam ka kongsan yong kani ka sngi da sneiñ da kroo wei kyrsu kyntu ko ya ki khynnah Scouts-Guides deiwa ong, kynmoo i yachimbynta phi ha kani ka Camp toh wow yoh phi yeiwon yeiwon i tip wa thymme kamtæ man ki khynnah wa yaichah wei em i mynsien sñiaw chipayu khnang wa manda kut kani ka Camp iwon iwon iwa thymme, iwa sñiawsuk u yoh phi u rah cha ka yung ka sem, ki lok ki jor yong phi.
Katwa u Richard B Uriah won hei klam da pynkynmoo yei kyntien ‘Be Prepared’, kiwa man ki kyntien e mynsein ka Scouts-Guides Movement, hajrong kini ki kyntien da kyrsu kyntu u ya ki khynnah wow man kiwa da pynkhreh u maad u chem yeiwon yeiwon hapoh kani ka Camping nae hei lai luti yong ki hawa im kam ki bru kiwa dap chiboon i tynjooh.
Chooh chooh ha kani ka Camp da pyntasbahlang leh da i pynkup burom wa kyrpang ya ki Rajya Pursakar Scouts-Guides yong uni u snem 2025 kiwa dadep yow yoh yei pynkup burom na u Lat ka jylla ha u Khonchonglad ha Lok Bhawan Shillong.
Discussion about this post