Ka China ynnin ka sngi da sdang ko yei chna ya ka Dam wa heh bha wa chongdor USD 167.8 Billion ha ka wah Brahmaputra ha i bynta wa dang haap hapoh Tibet hajan ka jylla Arunachal Pradesh.
Yei kreh da wan wow wai da u Chinese Premier, u Li Qiang ynnin ka sngi ha ka yalang wa da pynman ha sor Nyingchi wei ya kani ka Dam u chna ha ka wah Yarlung Zangpo ha China wei manda poi ko cha India da tip ya ka kam ka Brahmaputra.
Hadien wa dep i chna ya kani ka Dam daw ye ko wow pynmih hadooh 300 Billion kilowatt-hours i bordiñ ha chi snem iwa daw ye wow pynyoh bordiñ neibynta palat 300 Million ngut ki bru.
Ya kani ka Dam u chna hei bynta wa dong bha ka wah ha i thaw wa synrang bha wa em ha ki loom Himalaya chwa wow poi ka wah Brahmaputra cha Arunachal Pradesh.
U Chief Minister ka Arunachal Pradesh, u Pema Khandu ha uni u bnai chwa wow sdang yei kreh da ong u wa kani ka Dam toh ka “Ticking Water Bomb” neibhah ye ko wow ktah yei im-ja ki jaitbru ri-loom ka jylla kiwa em ha rood ka wah wei da khuslai u leh wa ka China daw pynemkaam ko ya kani ka Dam kam ka tiar yaleh thma.
Ka India leh lyngba ka Foreign Ministry dadep ko wow pynsñiaw yei sñiawkhia yei chna ya kani ka Dam hajan u pood ka ri najrong kani ka thaw toh kawa joor i khih khmi.
Discussion about this post