Ka e sikai seiñ khih namo ka Business Start Up wa 45 sngi wa da kyrchaan poisa da u Wailadmiki Shylla, MLA ka 2-Jowai Constituency, da wai paidbah yaka ynne ka sngi haka yalang wada pynman ha Thomas Jones Synod College Jowai, heiwa ki khynroo khyllood wada chah jied wow yoh yei sikai da em ki kamwa 60 ngut na ki 4000 tam kiwa da yaleh.
U Programme Coordinator, u Eladmiki Suting hawa e yei klam yahkhmat ong u i thmu kani ka e sikai toh yow pynpsiah hei theij i pyrkhat kiwa wan chimbynta wa kammon u sdang ki yei khih hadien i puræ puthi, wei u sdang leh dei stat i chemphang ym du kat wa yoh poisa sdang wot ya kawon kawon ka kaam.
Chooh chooh lyngba kani ka e sikai, da angnood ki wa manda dep chah sikai neini u man ki kiwa yahkhmat haka imlang sahlang kam kitæ kiwa seiñ khih wei e khih heijooh i por ym du wow chaniah hei kreh sorkar.
U General Manager District Commerce and Industries Centre, West Jaiñtia Hills, u P. Toi, hawa pynsñiaw yaka Scheme PMEGP, da ong u wa kiwa seiñ khih ye ki u yoh yarap naka chnat krehkaam yong oo, da e nongmuna u yei eh i khoo wa boonsien hi kiwa wan yaleh hawa mut sdang khih ki, wym em pait bniah bha ki yaka yaw ka haat hei thaw wa mut ki.
Ini i eh i khoo mih i toh wa haki skur ki College, ki khynroo khyllood wym em yoh sikai ki heiyatoh wa ini, kamtæ lyngba i wanrah u MLA ya kani ka e sikai yooluti u wow yarap ko chibon ya ki.
U Deputy Commissioner, West Jaiñtia Hills District, u Garod LSN Dykes hawa pachat yumut ong u wa kam kiwa seiñ khih toh u sñiawthooh chwa ya i dæ, u em i chaniah ha i dæ, u kreh chitom wei yaichah. Wei kamwa kani ka e sikai wa 45 sngi toh yow yah luti, kamtæ emkaam u pynpliah chooh chooh khnang wa kawon kawon ka kaam wa jied ki u man iwa pynmyntoi.
U CEO ka Jowai Cooperative Urban Bank, u A.M. Muksor hawa klam da pynsñiaw u yei rukom krehkaam kani ka Bank wei khana u leh da yaki laad yarap wa ye u yoh kam ka ram neibynta kiwa kwah seiñ khih wa khian lane ki wa heh.
Neiliang u kongsan, u Wailadmiki Shylla da ong u wa i wanrah yong oo kam kani ka e sikai toh wa kwah u wow leh iyi re iyi wa rap phær neibynta ki khon khynroo khyllood wym toh wow yooluti bait du yei khih sorkar.
Neitæ i booh thong yong oo toh wow yarap T. 2 lak ya u lane ka wa jop haka yakob chna Business Plan wei kani ka e sikai leh toh chibynta u pynchlur khnang wa kiwa chimbynta u chimkhia ki.
Heijooh i por ong u kamwa katni toh ka pyrthai yakob, da ban joor u hajrong i emkaam u chimkhia wei wow leh iyi re i iyi wa rap phær khnang wa ki bru u pait khmat ki.
Khana haroh u wa kani toh i sdang wei lada man jop lyngba i chimkhia ki khynnah ye u pteiñ biang yaka.
Ha kani ka sngi da emlang leh ki MDC ka JHADC wa kynthup u Phasmon Dkhar, u Lakhon Dkhar, u Saron Paswet, u Brightstar Chyrmang, u Otomewot Lamin, u Principal ka Thomas Jones Synod College u K. Lyngdoh wa kiwi de.
