Ka Jingiaseiñ Khynroo ka Balang Presbyterian Mustem ha ka 23 tarik uni u bnai da lehkmen ko yei dap 75 snem namo ka Platinum Jubilee yong ka hajrong ka phang “U Khrist ha phi ka Jingkyrmen ka burom”.
Ha ka yalang lehkmen wa pynlai da u Iahmeheibha Ladia, Chairman Jingiaseiñ Khynroo da yoh i puræ duwai na u Tuboimi Nongpluh, i khana yei lailuti ka seiñ khynroo na u Secretary, u Yozarky Khlem, uwa da ong wa ya ka Jingiaseiñ Khynroo ka Balang Presbyterian Mustem ym em yoh ki ya ka tarik wa tikna yei sdang yong ka, tangwa lyngba kiwa ksohkaam wa dang im hadooh kini ki sngi da pynsakhiat ki wa da sdang ya ka ha u snem 1950.
Wei hanla ka Jingiaseiñ Khynroo nadooh wa sdang da em ko yei duna ha ki liang waroh khamtam hei puræ puthi, i thoh i tar tangwa sñiawngooh won ki yow Blai wa pynmih u ya ki bru wa kreh yei kaam khlem da kheiñ yei buit i bor, kiwa yieñ skem haka Balang wei man sakhiat leh kiwa rah pateiñ yei kaam u Blai kynrad ha ka Balang, na itæ i daw ka Jingiaseiñ Khynroo man ko kamwa man katni.
Khana haroh u wa ka Jingiaseiñ Khynroo nadooh nachwa hadooh katni ki sngi man ko kawa smat wow yarap ya ka Balang ha kiwa boonjait ki liang wot ha ka imlang ka sahlang kamjooh.
U Rev. E. Nongpluh hadien wa dep wai ya ka Jubilee da klam u leh hajrong ka phang yong kani ka sngi deiwa ong, kani ka Jubilee mut wei thaw ko yei im wa kynja mynsien hei wow yoh maad yei maya, yoh maad yei maap wa makna, wei wow yoh yei suk heini ha pyrthai.
Kani ka Jubilee khut ko leh wow pait ya idæ, wow pynkhian hakhmat yong u Blai.
Wei ka phang yong kani ka lehkmen leh man ko kawa khroo wa mayan hadooh kattæ kattæ, kawa dawa ya ki khon khynroo ka Balang wow yoh maad yei pynim u Khrist, wow pynwandur ya idæ heiyatoh wa i chakri Blai, u pynem warom ya oo hei im lyngba ki kaam wa man-ka-sngi khnang wa ka burom yong oo u yoh chong ko hei im yong ki.
Kamtæ e u i kyrkhu ya ki khon khynroo yong ka Balang wa ha kani ka Jubilee wa 75 snem u yoh maad sakhiat ki ya u Khrist hei im yong ki, wei heijooh i por wow man u leh i kyrmen i burom ya ki khon khynroo ka Balang ha ki bynta waphær waphær i im yong ki.
Wei u Blai wow emlang u chirup wa ki ha kiwon kiwon ki kaam wa leh ki la heiyatoh wa kani ka lehkmen Jubilee hadooh wow pynkut ya ka.
Ha kani ka sngi da wai leh ya u mot sahkynmoo da u Tbn. O.B. Huwa, Moderator Jowai Presbytery, i pylnait Memento da u Tbn. M.L. Pyrtuh, Chairman Jingiaseiñ Khynroo District, i pynhær ya ka lama Jubilee da u Tbn. H. Shylla, Chairman Balang wa i rwai kyrpang na ka Standing Choir.
Discussion about this post