15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Sdang ka KHADC wow khynra ya ki baar jylla wa chong dai madan, kam tre ki Khasi boon tylli ki dukan

0 Comments
Advertisement ad1
Advertisement ad1

Shillong: Ka Khasi Hills Autonomous District Council (KHADC) ynne ka sngi da pynman ko yaka khynra ya kiwa chong dai madan yong ki baar jylla kiwa chong dai pyrchah yaka aiñ ha ki thaw wa haap ha u pood u ang ka District Council kiwa da leh khlem da yoh bor.

I khynra da sdang nadooh i por 10 waje i step, wei ka khynra da lai ko nadooh ka thaaiñ Iewmawlong, Motphran ter ter cha ka surok bah wa lai cha ka thaaiñ Bimola wa Umsohsun.

Ha kani ka khynra da sakhi ya kiwa boon ki dukan wa jooh chong ki baar jylla wei da wan kam tre won da ki Khasi wa toh ka thaw yong ki wa jooh chong da ki wei ini da jia i ha thaaiñ sarok Motphran ter ter cha Umsohun.

Hachwa wow poi cha ka laad wow lai cha Umsohsun da mih leh i yania hapyrdi ki baar jylla wa ki dkhot ka chnat Enforcement ka KHADC neidaw wa hadien wa da beh ya ki dkhar na katai ka thaw, da wan mih sa ki Khasi wa chong dai madan ha kitai ki thaw, neiliang ki dkhar da pynmih nia wa toh u khynra leh ya ki dukan Khasi wei ym toh wow e laad leh ya ki Khasi leh wow chong dai madan. Yow pyn jai jai noh ya kani ka yania, neiliang ki pulit ka Sadar Police Station da rah noh chipor ya uwi u baar jylla wei da pyllait noh rap hadien.

Hawa yaklam wa ki laad pathai khubor ynne i janmiet, u Executive Member ka KHADC wa pait yaka kaam khayi, u Paul Lyngdoh da ong u wa ka khynra man ko kawa lai bait wei da synran lang leh ya ki wakreh ka KHADC da ki pulit ka nongbah Shillong yow lait na i kulmar.

U Paul da ong u wa i khynra yong ka KHADC ya kitai ki dukan ki baar jylla man ko katkam ka aiñ yong ka Council, ka Trading By Non-Tribal Regulation Act, 1954 wa ki Rules yong u snem 1959 ya kiwa da pynkylla ha uni u snem 2019.

“I leh i yaka kaam khlem da lai lait ya ki kyndon yong ka ain wa i em i,” da ong u.

Heiyatoh wa ki tre chnong kiwa chong dukan, u EM da ong u wa man ko i bynta yong ka sorkar jylla katkam ka aiñ Meghalaya Public Premises (Eviction or Unauthorised Occupants) Act, 1980.

Da ong u leh wa yaka khynra daw sangeh chwa neidaw wa ki pulit ym lait ki wa boon kaam ki neibynta i wan u President ka ri India, u Ramnath Kovind ha ka 4 tarik Khonchonglad (Nov).

“I pynsangeh chwa chipor toh neidaw wa kwah i wow pyntikna wa kayi kawa i leh i u man ko kawa jop, neibynta ini emkaam i leh ya i krehkaam lang wa ka chnat pulit khnang wow pyntikna leh wa ha kani ka lai khynra ym mih iwon iwon i jia,” da ong chooh chooh u.

Hawa kylli ya i kam tre yong ki kattu katni ki Khasi ya ki dukan ki baar jylla, u Paul da ong i, “I daw chem i yei sakhiat waroh neibhah waroh kiwa chong dai madan hap ki wow chim ya ki Form wow pyndap heiwa daw hap ki wow batai lut ya ki kaam yong ki.”

Ha iwi tawon i liang u EM da pyntip u wa da yoh wow yaklam wa u montri pynroi sor ka jylla, u Hamletson Dohling wei kamjooh ya ka chnat pulit hajrong kani ka kaam khnang wow yoh ya i krehlang.

“Yow pynkyllooid biang ya ki thaw paidbah, du ka KHADC ym ye ko wow leh, i emkaam i ya i kyrchaan naka sorkar jylla. Katkam i yaklam nga sñiawthooh O wa ka sorkar leh ka kyrchaan ko ya kani ka kaam wa da leh ka Council,” ong u Paul.

Share this:
Previous

Pynbna ka chnong Mutong ya ki ar thaw kam ki Fish Sanctuary

Next

Daw Boycott kiwa sikai ka NEHU yaka Convocation neidaw wym hun yei krehkaam u VC