Ka yakob kynjat bol watip heiwi i kyntien kam ka 10th Tiger Five Football Tournament wa da pynman da ka Sport & Youth Affairs Committee yong ka Dorbar Chnong Chilliangraij hajrong ka thong wow kyntu kynrong ya ka yalehke Sports hapoh ka chnong ka thaw.
Ha uni u snem ya kani ka yakob dasdang nadooh ka sngi Muchai 4 tarik Naiynru heiwa ki dhab waroh kiwa yachimbynta da em ki hadooh 22 tylli wei dawan wow wai ya ka da u Andrew Shullai, MDC.
U Andrew Shullai da yaroh u yaka Sports & Youth Affairs Committee yong ka Chilliangraij kawa da chimkhia u pynman ya kani ka yakob neibynta i myntoi ki khon khynroo wa em sap ha ka Football chooh chooh da e mynsien u leh ya kiwa ya chimbynta kiwa da mih madan ha kani ka sngi.
Na ki ar tylli ki yakob kiwa da pynman ha kani ka sngi sdang, ka Sholay FC dajop ko ya ka Stand War FC da 2-1 katwa ha kawi wan ka yakob ka Kyllain J da jop ko ya ka Nakasaki FC lyngba ka Tie Breaker.
Ya ka ‘First Round’ yong kani ka yakob da booh thong wow pyndep ha ka 13 tarik uni u bnai katwa ka song poisa won wa damang kyrpang neibynta ka liang wa poi cha ka thong wow jop ya waroh toh T. 40,000 katwa kawa chah rem won T. 20,000.
