Jowai: Ynne ka sngi da sdang ka Lockdown namo wow khang ya waroh ki kaam ha kylleiñ ka ri India kamwa da pynbna da u montri rangbahdooh ka ri, u Narendra Modi ynnin i miet ka 24 tarik.
Ya kani ka Lockdown da leh kam chibynta wow yakhun pyrchah wei wow khang yei poor ka khlam u COVID-19 hapoh ka ri.
Kani ka Lockdown u man ko kawa 21 sngi heiwa da kyntu ya waroh wow chong namo wow neh ki hapoh yung khlem mih cha lait.
Hapoh ka jylla Meghalaya kam wow pynkrehkaam ya kani ka Lockdown da pynkrehkaam saka Curfew kawa sdang nadooh 9:00 PM ka 24-03-20 hadooh ka 8:00 AM ka 28-03-20. Katkam wa man ynne, heipor 10:00 i step ha Jowai da sakhi wa ki dukan dukdoh da man ki kiwa khang, lait na ki dukan dai dawai, kiwa dai kotkhubor wa kiwi kiwi.
Da sakhi leh yei boon ki pulit kiwa da phah sangeh ya ki kari kiwa lai wa wan wa lai khlem yohbor wei khlem biang ki daw heiwa da phah liwan noh ya ki.
Heiyatoh wa duna ki mar baam ha yung ki bru, wa ki yaw wa toh u wai, neiliang u Wyrta daw pyntip i chaphi hajrong ini waroh.
Discussion about this post