Shillong: U montri rangbah ka jylla u, Conrad K Sangma, ynnin ka 22 tarik da lai hiar u cha ka Jirang Block yow sdang yaka Block to Block Programme. Ya u Conrad da synran da u MLA ka Jirang u Sosthenes Sohtun wa u Commissioner and Secretary, C&RD Department u P Sampat Kumar. U montri rangbah da lai pait ua ya ka chnong Nongsier wa Umlakro kiwa em hapoh ka Jirang Block yow booddien yei pynkrehkaam yaka MGNREGA, PMAY, JSA wa CLLMP Scheme.
Haka yalang wa pynman ha pchem ka Jirang C&RD Block Office, u Conrad K Sangma da ong u wa i thong kani ka Programme Block to Block toh wow lai cha waroh ki Block ha kini ki ar snem. Da ong u leh wa kani ka Block to Block Programme da sdang ya ka leh yow yoh u yoo dei khmat yei pynkrehkaam ya ki Scheme, i chitom wa chem ki wow pynkrehaam ya ki kaam pynroi ha ki Block waphær waphær.
“Du deiwa lai cha ki chnong wei deiwa yaklam wa kiwa chong chnong wei deiwa sakhi dei khmat ya i eh i khoo kiwa sah cha nongkyndong u ye ka sorkar wow thooh ya ki buit wa thymme yow yarap ya ki paidbah,” da ong u Conrad. Da pynchlur u leh ya ki MLA wa ki sahep sorkar wow lai ki cha ki chnong nongkyndong wei wow yaklam wa kiwa chong chnong yow tip ki iyi chem chitom kiwa toh u yoh myntoi wei wow thooh laad kammon wow pynbait ya iwa chem chitom ki paidbah.
U Conrad da ong u leh wa ka Jirang Block ha kini ki snem wa da dep da hiar bha i pynkrehkaam kam yaka MGNREGS wei emkaam ya ki Block Development Officer wa kiwi ki sahep wow pynku ki yei rukom kreh ki yow ku lang ka Block ka wow man i myntoi ya ki paidbah kani ka thaaiñ.
Discussion about this post