I chah pyndik ki Pnar ka chnong Lapangap, West Jaiñtia Hills ha ki jaitbru Karbi ka West Karbi Anglong District, Assam dang pteiñ i hadooh ynne ka sngi khamtam ha ki hali ki pynthor wa em ha Umchyrngan wa mantre du da ki bru Pnar ka chnong Lapangap.
Ynne ka sngi hawa yachem wa ki kattu katnu ki bru na chnong Lapangap ha Jowai, Nartiang wa kiwi ki bynta da ong ki wa hadooh ynne ka sngi i man i long dang man i jooh hi neibhah wa dang em ki manyung ki wym pu yoh u thung ya u kba kamjooh leh wow pait ya ka um ha ki hali kba.
Da pynbaad ki leh wa hadien wa wan u Symbood Montri Rangbah, u Sniawbhalang Dhar ha Lapangap ha ka 8 tarik uni u bnai da kular u wow thooh ki laad wow yarap ya ki paidbah ka chnong tangwa man i iwa sepai lut.
Katkam ka khubor wa yoh hadooh ynne ka sngi da ong wa ym em ki pulit wa wan thymme ha Lapangap wow yada ya ki paidbah wei kiwa em leh neh ki heijooh i thaw hapyrdi ka chnong.
“Hawa kamni kammon won de u ye i wow chaniah ya ka sorkar Meghalaya kawa da sdang wow jngai na i?” da kylli uwi na ki khynroo na ka chnong Lapangap.
Sa uwi tawon u bru da kylli u wa heipor wa wan u Sñiawbhalang da kular u wow pynsah pulit hajan Umchyrngan, tangwa hadooh katni ym em poi ki wot hadien da boon sngi leh.
Puræ leh: Hiar u Sniawbhalang cha Lapangap deiwa kular ya ki paidbah wow wanrah biang yei chongsuk
Discussion about this post