Ka Rangdajied da e ko yei rem wa nyngkong ka Mawlai SC hadien 12 sien i yalehke ha kani ka Shillong Premier League 2021-22 deiwa jop da 3-2 ha ka Third Ground, Polo, Shillong ynne ka sngi.
Ka Rangdajied da thap ko lyngba u Wanlamsuk Nongkhlaw (21’P), u Oresterwell Langshiang (24’) wa u Dibormi Kassar (53’) katwa ya ka Mawlai da thap da u Oversharp Iawphniaw (26’) wa u Sambor Kharsahnoh (81’).
Chwa ynne, ka Rangdajied toh kawa em 22 Point katwa ka Mawlai kawa da rah chwa ya ka SPL ha uni u snem da yoh ko 32 Point. Hawa yachem khaddooh kini ki ar liang, ka Mawlai da jop ko ya ka Rangdajied da 1-0 ha ka 25 tarik u Naiynñiaw.
Ka Rangdajied deiwa jop ynne dapoi i Point cha 25 katjooh waka Langsning.
Ynne leh da man ka yaleh wa khaddooh ka Round wa 13 wei dang sah sa du soo tylli ki yalehke. Ha ka 20 tarik ka Malki SC waka Shillong Lajong FC daw yaleh ki ya ki yalehke wa khadooh yong ki ha kani ka samoi.
