Shillong: Hadien wa ka Hynniewtrep National Liberation Council (HNLC) da pynsñiaw ko wa man ko kawa smat wow pdiang sñiawbha ya i tyrwa ka Bharatiya Janata Party (BJP) Meghalaya wow pynyachem waka sorkar India khlem da booh kyndon, neiliang u Montri ka sorkar Meghalaya Democratic Alliance (MDA) uwa man leh u MLA ka BJP, u AL Hek ynne ka sngi da ong u wa neiliang yong oo samen leh man u uwa smat wow chimkhia ya ini i angnood yong ka HNLC wow pynpoi ya ini i sñiaw yong ki cha i chkoor ka NDA wa yahkhmat da ka BJP.
Hawa klam ynne ka sngi wa ki laad pathai khubor, u Hek da ong u wa smat u wow pynyachem yaki dkhot ka HNLC wa u Amit Shah uwa man u Montri kaam pohyung ka ri India næ wa kiwon kiwon ki montri ka sorkar pyrdi.
Hawa kylli hajrong i kwah yong ka HNLC wow yaklam khlem booh kyndon, da ong u wa kam uwa yahkhmat ka jylla daw pynsñiaw ya i kwah ka HNLC cha ka sorkar, tangwa chong won haka sorkar India kammon wow phah, lada hap ki wow pyndem chwa næ ye ki wow yaklam chwa.
(Feature Image-File Photo)