15 49.0138 8.38624 1 0 4000 1 https://wyrta.com 300 0

Sñiawkhia ka Congress yeiwa ye u thung MDC na kiwi ki jait bru ri-loom hadien wa pynkylla yaka Sixth Schedule

0 Comments
Advertisement ad1

Shillong: Ka liang pyrchah ka sorkar jylla, ka Congress Party, ynne ka sngi haka yung dorbar da pynsñiaw ko yei sñiawkhia ya i ktien “Unrepresented Tribes” kawa em ha i pynkylla (Amendment) ha ka Sixth Schedule ka Constitution ka ri.

Hawa wanrah ya kani ka phang haka kynta kylli namo ka Question Hour, ka East Shillong MLA, ka Ampareen Lyngdoh, da pynsñiaw ko yei sñiawkhia ya i ini i ktien wei da toh wow pyndam ki na i pynkylla yaka Sixth Schedule.

Advertisement ad1

Da kwah ko wow tip wa kiyi kitæ ki “Unrepresented Tribes” wei yei yi mut ki.

Da kwah ko leh wa ha i thaw “Village Council” wa “Municipal Council” toh u booh noh da i ktien “Dorbar Shnong” wa “Dorbar Raid”.

Hawa jubab ya ini, u District Council Affairs (DCA) Minister, u James K Sangma da pyntip u yaka dorbar wa ini i ktien mut ki ya kitu ki jaitbru ri-loom kiwa ym yoh u mihkhmat ha ki Autonomous Territorial Councils.

“Kini ki jaitbru ri-loom toh kiwa kiwa da tipmit daka Meghalaya,” ong u James.

Katwa neiliang u MLA ka Congress na Umroi, u George Lyngdoh won da ong u wa ym em mynjur u yeiwa ong u DCA Minister deiwa ong wa “Unrepresented Tribes”, toh u chim ya ki katkam ka Presidential Order ka 1950.

“I emkaam i wow wanrah yaka rai wow pynkylla yaka Presidential Order ka 1950,” da ong u Lyngdoh.

Da ong u wa em 50-60 ki jait bru ri-loom kiwa em hapoh ka Presidential Order ka 1950 wei lada pynkrehkaam yaka, daw hap wow thung MDC ka Council na kini ki jaitbru kiwa em ha kylleiñ ka thaaiñ mihsngi.

Kam wow pynkynmoo wa ya i pynkylla yaka Sixth Schedule da tyrwa wow yoh wa mihkhmat na ki “Unrepresented Tribes” wa toh u pynemkaam hapoh ka Khasi Hills Autonomous Territorial Council (KHATC) waka Garo Hill Autonomous Territorial Council (GHATC).

U James da pyntip u wa da em ka Committee wa khlieh da oo yow bichaar ya iwa sñiawkhia kiwa boon ki seiñ, ki waheh chnong, Elaka, Hima wa kiwi kiwi wei ya ini daw rah hakhmat ka Parliamentary Standing Committee ka Rajya Sabha.

Da pyntip u leh wa daw pynboon ya ki MDC haka GHATC naka 30 cha ka 42 wei na kini 36 ngut toh ki wow jied deiwa thap Vote lyngba ka Election.

“U Lat daw thung u 6 ngut (Nominate) heiwa ar ngut toh u man ki ki kynthai wei 4 ngut toh na ki jait bru wa ym yoh wa mihkhmat namo ki Unrepresented Tribes,” da ong u DCA Minister.

Haka KHATC u pynku naka 30 cha ka 40, heiwa 36 ngut toh ki wow chah jied daka Election.

“U Lat daw thung u (Nominate) u 4 ngut ki MDC heiwa ar ngut toh u man ki ki kynthai wa ar ngut won toh na ki Unrepresented Tribes,” pyntip chooh chooh u James.

Katwa yaka Jaiñtia Hills Autonomous Territorial Council u pynku ya ki MDC cha ka 34 ngut, heiwa 4 ngut toh ki wow tung u Lat wei na ki ar ngut toh u man ki ki kynthai wei kiwi kamwa jooh u jied daka Election.

Da pyntip u leh wa lada em u MDC uwa chah jied kam u MLA lane u MP daw hap ieh u yei man MDC hadien 14 wa da pynbna yei jop u.

Advertisement ad1

0 Comments

Leave a Reply