Sñiawkhia ki MDC ka JHADC ya i rukom pyllai poisa ka Council nadooh u 2006-2008

Jowai: Ka JHADC ynne ka sngi da chong ko ya ka Dorbar Tlang yong ka wei da wanrah leh ya ka bui namo ka Report yong ka Comptroller and Auditor General of India neibynta u snem 2006, 1 Naitung (April) hadooh 2008, 31 Wisu (March) heiwa da ong ko wa da em i duna wa i yaphær iwa kynjoh hadooh T. 5.94 Klur.

Kani ka bui da chem ko wa ha kini ki snem ka yarong poisa ka Council ym em u kynthup ko ya ka poisa ha ki Bank Account wa pait wa yoo da ka tnat Civil Works wa ka Forest Department iwa yaphær da T. 4.24 Klur, T. 3.66 Klur wa T. 5.70 Klur.

Chooh chooh da chem wa ka Council da pteiñ i doohnong ko heiwa ha ka 31 Wisu 2006 da dooh ko 43.73 lak, ha ka 31 Wisu 2007 won T. 86.30 lak katwa ha ka 31 Wisu 2008 won T. 61.02 lak.

Nadooh u Khonchonglad 2006 hadooh u Wisu 2008, ka Council da doohnong ko hadooh T. 1.89 Klur hei yatoh wa ki Toll Gate wa em ha Mookyndur wa Ratacherra heiwa da e ya ki cha kiwa paan dor khian (low bidders) heithaw kiwa paan dor heh wow khrong ya ka dan.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Ha u Khonchonglad (November) 2006 ka Council da dooh ko T. 7.92 lak hawa e kreh wow chna ya ka mala wa ar wa kawa le yong ka MDC Hostel, heiwa da e cha kiwa paan heh dor wow chna ya ka bar ya kiwa paan khian dor dooh.

Ka CAG da chem ko chiboon i doohnong ka Council, wei hawa e laad u Chairman ka Council, u Arbor Hima Darnei ya ki MDC wow pynsñiaw ki ya ini, da yieñ nyngkong u Marki Mulieh da ong u wa ini da man i iwa sarom wa iwa pynsñiawsih ya oo kam u MDC wei lada kamni i rukom krehkaam ka JHADC ym slem de daw wiar ko.

Neiliang u Shemhok Garod da ong u wa ini man i i wym ye de u pynbait ya i doohnong ka Council neibhah wa i por man i iwa da lai wei da yooluti u wa kani u man ko ka nongmuna heiwa neini u ye u pynbait ya ini waroh.

Da kyntu u leh ya ki para MDC wa ki sahep ka Council wow kreh ha itæ i rukom khnang wa kam ini ym jia de i neini chakhmat.

U CEM ka Council da ong u wa neini chakhmat ka Council u yaleh ko u pynbait yeiwa bakla katkam wa da kdaw luti ka CAG deiwa kular leh wow chimkhia wow pynbait ya kini waroh.

Kiwi kiwi ki MDC leh da pynsñiaw ki ya i jooh i mynsien sñiawkhia wei da pynkynmoo ki leh ya kiwi kiwi wa iwon iwon iwa leh ka Council ym dam i u mih pyrthai heiwa da kyntu ya ka Executive Committe wa katni wa kiwa mynried wow tista ki ya i rukom krehkaam yong ki khnang wow ye u yada ya ka Council wei wow pteiñ ya ki kaamram yong ka.