Kiwa chong chnong ka Wapungskur ynne da mih paidbah ki yow lai ki cha ka thaw wa da thmu wow chna ya kawi ka karkhana Coke wa tip kam ka OM OM Coke ha i thaw wa tip kam i Thlukuru, Mookhep, East Jaiñtia Hills katkam wa da thoh ha ka kot Consent To Establish wa da e da ka Meghalaya State Pollution Control Board.
Tangwa neiliang u waheh chnong ka Wapungksur, u Postling Dkhar da ong u wa kani ka thaw toh kawa dang haap hapoh ka Wapungskur kawa da ri sumaar da ka nadooh ki por yongrim wei man ko leh ka thaw wa pynngaad tangwa da em wa e NOC won da kiwi.
Ini i leh ka Pollution Board da pynkulmar ko neibhah wym tip ka chnong iyi iyi chaphang ini waroh neibhah ini i thaw dang jngai bha i wow poi chadooh cha Mookhep wei da suba leh ya ka NOC da e da ka Mookhep wei iwa phylla leh toh ya u pood dadep wow pynbait wei u waheh chnong ka Mookhep tip u yeini neibhah wa yeini dadep pynbait boonsien wei u Dolloi ka Elaka Jowai leh tip u.
Da ong u leh da yoo katwon ktah ko ya ka la-ær deiwa em ki karkhana Coke wei ki u wan ki man-ka-sngi cha kani ka thaw yow pyntikna wym yoh u chna ya kani ka karkhana wei dadep leh wow beh ya kitu kiwa kreh.
Kamwa man kattæ da em i ah khyndaw da ki pooh chiloom yow sdang u pynyieñ ya kani ka karkhana tangwa da ong u waheh chnong wa dang lah wow kyrdooh kaam bar wow dooh ya ka la-ær wa khooid.
Da kylli leh kammon u Dolloi da e NOC neibhah oo leh tip u ya u pood u ang ka chnong wei hap u wow pynche yeini waroh.
Kamtæ da dawa wow kyrriah noh yei thmu wow booh ya kani ka karkhana Coke.
Discussion about this post