Shillong: U montri rangbah ka jylla, u Conrad K. Sangma ynne da lai sakhi u ya ka lehkmen Golden Jubilee ka Nongkseh Sports, Social and Cultural Club ha Nongkseh Shillong hei emlang u montri ka chnat pynroi sor, u Hamletson Dohling.
U Conrad wa u Hamletson da wai ki leh ya u mooyurim wow chna ya ka Indoor Stadium kawa da kyrchaan da ka sorkar jylla.
Neiliang u Conrad da yaroh u ya ka Club wa pynku ya ki kaam yalehke Sports deiwa pyntip wa ka sorkar yaleh bha ko wow pynku ya ka kaam yalehke hapoh jylla.
Da pyntip u leh wa daw chna noh ya ka Tribal Research Centre hapoh jylla wow pynneh yei rukom im wa kyrpang ki jaitbru hapoh ka jylla.
Heiyatoh wa i dap 50 snem ka jylla ha u 2020, da pyntip u wa da pynkhreh ya ka kot lakdop wow pynsahkynmoo ya ki kaam wa kongsan tam hapoh ka jylla.
Da pyntip u leh wa da mang hadooh T. 125 klur wow pynmiat ya ki madan yalehke hapoh ka jylla neibynta ka National Games wei ya ini da phah cha ka sorkar pyrdi. “Ka sorkar pyrdi da pyllait ko T. 50 klur wei yooluti pyn hapoh uni u bnai daw yoh sa T. 75 klur neibynta ini lyngba ka Minority Affairs Department”, da ong u.
Chooh chooh da pyntip u wa T. 200 klur neibynta ka Main Stadium ka National Games 2022 daw yoh ya ka ha u Duyatra (Jan) 2020 ya ka wow chna ha Umsawli, Shillong.
Discussion about this post