Kat dang mih ki sngi i eh i khoo wa chem kiwa kreh ka Jaiñtia Hills Autonomous District Council (JHADC) dang joor i neibhah wa ka tulop wa toh u yoh ki dang sah ko sa kamwa 11 bnai kattu.
Hajrong ini waroh, ynne ka sngi, ki 21 ngut ki MDC ka JHADC wa kynthup ya u CEM ka Council u Thombor Shiwat hapoh i yahkhmat u State President ka NPP uwa man leh u MP ka Rajya Sabha, u Dr. WR Kharlukhi wa u MLA ka Jowai, u Wailadmiki Shylla da yachem ki ya u Montri Rangbah ka jylla ha kamra krehkaam yong oo.
Hadien i yachem wa u Conrad Sangma, neiliang u Wailadmiki da ong u wa ini i chem chitom kiwa kreh ka JHADC wow yoh tulop toh iwa nadooh nachwa wei nadooh wa man u kam u MLA da jooh yaklam u ya ini i kaam khamtam hapoh ka yung Dorbar Chna Aiñ ka jylla.
Da ong u wa sñiawkmen wei da dap u dei yaroh heiwa u Conrad da kular u wow pynlait ya ka poisa wa toh u yoh ka JHADC ha ka 11 tarik uni u bnai wei kani ka poisa daw yarap ko chiboon khamtam ya kiwa daw lehkmen ya ka Behdieñkhlam.
Neiliang u CEM ka Council, u Thombor Shiwat da ong u wa neiliang ka Council da paan ko T. 50 klur na ka sorkar heiwa u Conrad da kular u wow e chwa T. 30 klur katwa ya ka T. 20 klur won daw yoh ha ki sngi ka tayaw wow wan hadien ka 11 tarik.
Kam wow kdaw heini ka Council emkaam ko kamwa T. 6 klur chi bnai wow su ya ka tulop kamjooh ka bai baam tymmen (Pension) iwa mut wa daw yoh kiwa kreh ka Council ya ka tulop kawa 4 bnai ha ka 11 tarik.
U CEM da ong u leh wa waroh ka poisa wa da toh u yoh ka Council dapoi ko T. 66 klur kawa da dep kheiñ sap wei neiliang u Conrad da kular u wow chimkhia ya kawa sah.
