U kyrtong ka United Democratic Party (UDP) na Sohïong Constituency, u Synshar Lyngdoh Thabah da la lai thap pyrtuid u ynne ka sngi ha yung krehkaam u DC ka East Khasi Hills ha Shillong neibynta wow yakhun ya ka Election heithaw u Kñi uwa da khlaad noh, u HDR Lyngdoh.
Ha kani ka sngi da synraan lang ya u Synshar da kiwa yahkhmat ka UDP, nadooh u President, u Metbah Lyngdoh, u General Secretary, u Dr. Jemino Mawthoh, u Paul Lyngdoh uwa man u Montri sorkar najrong kiwi won ryngkat wa ki hajar ngut ki paidbah kiwa da wan wow synraan.
Ka Election ha Sohïong da chah pynsangeh noh nei khlaad syndet u kyrtong ka UDP uwa man u MLA wa Montri sorkar warim iwa da jia ha ka 20 tarik u Thohlakhmi uni u snem.
Neiliang ka Election Commission da pynbna thymme ko ya ka tarik wow jied ya uwa mihkhmat ha Sohïong ka wow man ha ka 10 tarik u Naisan kam ka sngi thap Vote katwa ka sngi niaw Vote won ha ka ha ka 13 tarik utai hi u bnai.
