Ka BJP Meghalaya Pradesh da thoh ko cha u Montri ka chnat puræ puthi ka sorkar pyrdi wow pynyinsur ya ka tarik wow pyndap ya ka CUET 2022 deiwa ong wa ka North Eastern Hill University (NEHU) da pynkreh ko wow pynkrehkaam ya ka Common University Entrance Test (CUET-UG) neibynta waroh ki kyrdan puræ.
Da ong wa waroh ki College ha Meghalaya toh kiwa em hapoh (Affiliated) ka NEHU wei ini daw ktah i ya ki khynnah wa yang ya ka Result Class XII khnang wow pteiñ puræ ki ha ki College ka Meghalaya neibhah emkaam wow pyndep ki ya ka CUET-UG.
Chooh chooh da ong ko wa kiwa boon ki khynnah ymtip ki neibhah kani ka Exam wei ym du ki khynnah tangwa kiwa boon hi ki paidbah ymtip ki chaphang yong ka.
Heijooh i por ka BJP da ong ko wa daw poi i por wa ki khynnah ymye de ki wow lai puræ BA, B.Com, B.Sc wa kiwi kiwi neibhah boon ym em u yoh ki u pyndap wow yakhun ya kani ka CUET kawa da kut ha ka 30 Naitung (Apr) 2022.
Da ong leh wa hanla em ki khynnah wa ye u pyndap ya kani ka Exam tangwa chem chitom ki wa em du kawi ka Exam Centre ha Shillong wei ki khynnah wa Pass Class XII daw boon ware ki wow yakhun na kawi ka Centre.
Ka BJP leh da ong ko wa daw boon ki khynnah wa chem chitom ha u Naiynru-Naiynñiaw heipor wa yaleh College ki khynnah iwa daw ktah yei chongsuk katwa kamtæ da kyrpaad wow pynyinsur ya ka tarik wow thap pyrtuid neibynta kani ka Exam.