Uwa yahkhmat ka People’s Democratic Front (PDF) uwa man leh u Montri ha ka sorkar Meghalaya Democratic Alliance (MDA), u Hamletson Dohling ynne ka sngi da thoh u cha u Montri ka sorkar pyrdi wa pait ya ka Ministry of Environment, Forest and Climate Change, u Prakash Javadekar wow dawa na ka sorkar India wow pyndam noh chwa yei e bor namo ka ‘Environmental Clearance’ cha ka Star Cement Meghalaya Ltd. wow pynyaar ya ki paar moochuni ha Brichyrnot, East Jaiñtia Hills.
U Hamlet da ong u wa ka Ministry toh u pyrkhat biang ko ya ini i rai wow e bor ya ka Star Cement, neibhah kamwa man katni, kiwa chong chnong ha ka thaaiñ wa kynthup leh na ki seiñbhalang da pyrchah ki ya ini i thmu yong ka Star Cement wow pynyaar yei tih moochuni.
Da ong wa i maa toh neidaw wa ha ka thaaiñ Brichyrnot da em leh ya ki khloo wa rben wa kynthup ya ka Narpuh Wildlife Sanctuary kiwa ye u chah ktah wei chah pynsih, najrong ki wah wa kynthup ya ka Wah Lukha wa ka Wah Lunar.
Hawa kylli, u Montri da ong u wa ka yung krehkaam u Deputy Commissioner ka East Jaiñtia Hills wa ka Meghalaya State Pollution Control Board da pyntip ki cha ka Ministry wa ym ye ki wow pyman ya ka Public Hearing katkam wa thmu neidaw wa em i pyrchah wa joor, wei neidaw itai i pyrchah neiliang ka MSPCB da ekti bait ko ha ka Ministry wow leh yeiwa emkaam, kawa da chim yei rai wow e ya ka ‘Environmental Clearance’.
