Ka sorkar Meghalaya lyngba ka chnat puræ puthi da pynbna ko ya ki dkhot ka State Education Commission ki wow e buit ya ka sorkar heiyatoh wa ki kaam yong ki skur, ki College, ka tulop, i rukom pynlai ya ki skur kamjooh kammon wow pynkylla ya ki thaw puræ yow pynhun ya ki kyndon ka NEP 2020.
Ha kani ka Commission da thung ya ka Prof. Sherwin May Sungoh, Department of Education NEHU ka wow man kam ka Chiarperson, u Prof. David Reid Syiemlieh, uwa jooh man kma u Chairman warim ka UPSC wow man kam u Adviser deilang wa u Tony TC Marak, Retd, IFS uwa jooh man leh kam u Executive Chairman ka MBOSE.
U Ambrose Ch. Marak, IAS wa Secretary ka chnat Education ka Meghalaya u man kam u Member Secretary.
Kiwi de ki dkhot wow ya krehlang u kynthup ya ka Dr. C.A.R. Diengdoh, Retd. C.D.C. NEHU Shillong, ka Dr. Vanessa Kharmawphlang, Principal, CTE (PGT), Shillong, ka Dr. Nikme Salse Ch. Momin, Professor North Eastern Hills University, Tura Campus, u P. Ryngsai, Retd. Addl. Director of School Education & Literacy, Shillong, u Richard Uriah, Principal North Liberty HS School, Jowai wa kiwi kiwi de.
Kani ka Commission u pait ko leh ya kiyi ki daw wa ktah ya ka puræ puthi hapoh ka jylla, kammon u pynlai ya ki thaw puræ wa yoh yarap na ka sorkar, kammon miat ka rukom e sikai wei kammon wow em i kitkhlieh ki SMC.
U pait leh kammon u leh yow lait u noh chiliang i rukom su tulop ya kiwa sikai, ki kaam wa yatoh waka Samagra Shiksha Abiyan (SSA). Ki skur wym ye u pynkrehkaam, i duna ki khynnah wa lai skur, ki skur wa em du uwi uwa sikai, i chem chitom kiwa em cha thaaiñ khappood wa kiwi kiwi de.
Hap ki leh wow pynchna ya ki kyndon krehkaam yow pynpliah yei rukom krehkaam ka chnat puræ puthi.
Kani ka Commission u krehkaam ko chisyndon wei u neh ko ar snem itæ deiwa kheiñ nadooh ka 14 tarik uni u bnai.
Discussion about this post