Ka Hynniewtrep Border Dispute Redressal Forum (HBDRF) da dawa ko wa i takit yong ki Inquiry Commission ka jylla Assam wa Meghalaya hajrong i chah siat yap ha Mukroh, toh u e noh ki ya ka bui (Report) takit cha ka sorkar pyrdi khnang wow lait na i chah chiliang.
Hawa klam ynne, uwa e ktien ya ka Forum, u Thomas Passah da ong u wa nadooh wa sdang i takit da em ka dawa wow takit da ka Central Bureau of Investigation (CBI), tangwa da chna ya ki ar tylli ki Inquiry Commission yong ka Assam wa ka Meghalaya.
Da ong u wa ka Forum sñiawsih ko hajrong i pynbna ka dhab takit ka Assam wa da hap wow khylliap noh ya ka takit hadien wa ka Meghalaya ymye ko u e ya ki sakhi sabut wa biang hajrong ini i jia, katwa ha ka dhab takit wa da thung da ka sorkar Meghalaya da pynyoo wa dadep takit ko na waroh ar liang, itæ na Meghalaya wa Assam heiyatoh wa iwa jia ha Mukroh.
U Thomas da ong u wa da che kdar wa ka sorkar Assam da dep e ko ya ki sakhi cha kiwa takit neiliang ka Meghalaya hajrong ka yurim wa yieñ ki, katwa na neiliang ka Meghalaya ym em de u phah ko cha ka dhab takit ka Assam wow pynskem ya ka yurim wei wow yieñ pynrem ya ki bru wa da siat ya ki 5 ngut.
Chooh chooh uni uwa yahkhmat ka HBDRF da ong u wa katni ka Inquiry Commission yong ka Assam wa ka Meghalaya u wanrah ki jar jiar ka Report, wei i yu kylli wa mih toh kiyi wow bichaar ya kini ki Report yow pynsakhiat kiyi wa bakla, neibhah nadooh wa sdang neiliang kiwa boon na Meghalaya da dawa ki wow takit da ka CBI yow lait i noh chiliang.
U Thomas da ong u wa ka sorkar Meghalaya toh u pynche ko hajrong kawon ka yurim wa jia ha Mukroh wei kammon u jubab ko ya ka Inquiry Commission yong ka Assam, khamtam hadien wa ka Commission da pynbaad ko ya ka sorkar Meghalaya, wei hadien wa ka sorkar ymye ko wow lai jubab ya ka Commission heipor wa wan ko cha Shillong.
Puræ leh: Ym em wa wan hakhmat ka Commission wow e sakhi yeiwa jia ha Mukroh
Discussion about this post