Uwi u khla Royal Bengal Tiger da chah bom u hawa yap ha Dusutomukh ka Golaghat District, Assam heiwa da ong wa uni u khla da uiñ u ha ini i thaw da boon tayaaw.
Ki tre chnong da kam ki wa ha ki sngi wa dadep uni u khla da tynyap u ya uwi u bru hajan ka chnong Chelek wei da baam u leh ya kiwa boon ki mrad wa ri ki wei ini da pynsier ko ya ki paidbah kiwa da chrai leh heijooh i por.
Katkam ka khubor wa da mih, ki paidbah da rai ki wow chim ya ka aiñ ha kti hadien wa em wa pyntip wa em wa yoo ya uni u khla heiwa da ki hajar ngut da yalang ki ha thaaiñ Khumtai heiwa da thooh ki wei da bom ki ya uni u khla da ki dieñ wa ki tiar wa nep.
Chooh chooh da ong wa ym em u wan siat dawai pynyohthiah namo Tranquilizer ya uni u khla hanla kyrpaad boonsien ya ka chnat Forest.
Neiliang u MLA ka Khumtai, u Mrinal Saikia da beiñ u yeini deiwa ong wa man i iwa jia wa sihlet deiwa ong wa ka sorkar toh u chimkhia ko yeini.
Hawa wan chimkti ya uni u khla da ki bru ka chnat Forest ynne ka sngi da chem wa da em wa khloh ya ki lamieñ wa nep, da ah leh ya ki kjat wa i tdong wei da khloh leh ya ka snieh u.
Discussion about this post