U montri rangbah ka jylla, u Conrad K. Sangma ynne da khana u yei myntoi wa i dooh myntoi na i pynyinsur ya i rta kiwa yaleh kreh sorkar wei yeini da khana u hajrong i phang yaklam wa wanrah u MLA ka North Shillong, u Adelbert Nongrum ha yung dorbar chna aiñ ka jylla.
U Conrad da ong u wa i pynyinsur ya i rta daw myntoi bha i ya kiwa angnood sakhiat khamtam kiwa ymye u lait ha kiwi ki jait Exam wei pyndooh mynsien i leh ya kiwi kiwa dang pyndep puræ wot wow yoh kreh ki
Da kdaw u leh ya i kaamram ki sahep Meghalaya Civil Service (MCS) khamtam kiwa dawa i kreh wow em ki i doh i pran wa khlan (Physically demanding) heiwa ki sahep khian (Junior Duty Post Officer) pynlut ki 10-15 snem hei kreh ha ki kaam wa rap khian (Duty Work).
Da batai u wa i kaamram yong ki toh wow leh ya ki kaam (Field Work) kam hei wow takit, u sylli ya ki kreh, u sorjamin, wow lai e yarap, wow wanrah yei chongsuk wei da pynrap u wa lada pynyinsur yei rta daw duna bha i por wow man kiwa chemphang (Experience) wot hei wow ku kyrdan.
U Conrad da ong u leh wa katkam ka Pension Scheme 2010 i myntoi wow yoh manda chong-ngiah toh u man i katkam i e chakri iwa ym yahaap de lada duna i por wa kreh (Service).
Chwa ini, u Nongrum da ong u wa katkam wa man katni, i rta wa khaddooh (Upper Age Limit) wow yoh kreh sorkar kawa 32 snem ya ki Scheduled Tribe toh wa da chong pyrkhat ha ki snem 1970, 80 wa 90 heiwa dang duna bha kiwa da stat wei boon won ki kreh katwa kamtæ da emkaam wow lai katkam wa yah i juk wa i por.
U Nongrum da tyrwa u wa ha Meghalaya toh u pynheh ko ya i rta cha ka 34 snem heiwa u pynyinsur won cha soo snem (38 snem) ya ki Khasi, Jaiñtia wa Garo wei 40 snem ya kiwa yakhun kreh sahep kam ki MCS, MPS, MFoS wa MFS.
