Jowai: Hadien wa da kut ka Dorbar yong ka chnong Ummulong kawa da phah pynman da ka yung kasari Meghalaya High Court hei yatoh wow pynyoo bor hapyrdi kiwa dang kyrchaan ya u SS Langi wa kiwa pyrchah ya oo wow man kam u Waheh Chnong ka Ummulong, neiliang u Chairman ka Ummulong Village Dorbar u Briwon Pohshna wa u Secretary u P. Lamare da phah ki ya ka Bui (resolution) cha u Secretary ka Executive Committee ka JHADC wa cha u Dolloi ka Elaka Jowai.
Ha kani ka bui da kam wa ka Dorbar da chim ko ya kini ki rai hawah:
(a) Wa da yoh u pynyoo ya kiwa chaniah wa kiwa pyrchah ya u SS Langi da em ki paidbah ha kani ka dorbar kiwa na baar ka chnong, da em ki khynnah khian kiwa ympu em ka EPIC ha kani ka dorbar wei da mih leh i kulmar, kamtæ ym em u man ko kawa che wow e ya kawon kawon ka rai lada pyrchah namo kyrchaan ki paidbah ya oo.
(b) Kamtæ u Chairman da chim ya ka yumut wa da e da ki paidbah, wei ka rai ki paidbah wa ka Dorbar khaddooh da e yumut ko ya ka District Council lyngba u Dolloi uwa man kam uwa sakhi namo u Observer wow pynman noh da ka Election Waheh Chnong, katkam ka luti wa biang, yow tip ya iwa sakhiat.
(c) Hadien wa ka dorbar da mynjur ko wow pynman ya ka jied Waheh Chnong wei kamjooh wa ym em de iwon iwon da pynkut noh ya kani ka Dorbar.
Ka Meghalaya High Court ha kani ka 5 tarik uni u bnai da hukum ko wa toh u pynman ya ka Dorbar wow pyntikna yei boon paaid kiwa kyrchaan namo kiwa pyrchah ya u Langi wei wow ap yei eh i khoo kiwa chong chnong ka Ummulong.
Katkam wa man wa sakhi wei wa yoh ka sabut lyngba ki video recording, kani ka bui wa da phah da u Chairman wa u Secretary man ko iwa phær bak na iwa jia ha kani ka Dorbar ynne ka sngi.
“Ym em u tyrwa ki paidbah da ka Election, wei kiwa pyllai leh ym em u tyrwa ki da ka Election, i dawa i katkam ka Dorbar ynne wa toh u tyngkheiñ ya u Langi kam u Waheh Chnong kamjooh leh u tyngkheiñ ya ka EC khnang wa i hok ki paaid ka Ummulong u im i,” da ong kawi na ki manbei ka D. Lamare wa kiwi ki manbei hawa yaklam wa ki lyngba ka phone.
Discussion about this post