Ka West Jaiñtia Hills District Cricket Association da jop ko ya ka East Khasi Hills Cricket Association da 9 Wicket ha ka sngi nyngkong ka U-14 Girls Inter District Cricket T20 2023 wa da pynman ha Nongpyndeng, West Khasi Hills ynne ka sngi.
Kiwi de ki yalehke wa da toh u pynman ynne hapyrdi ka Shillong Cricket Association waka West Khasi Hills District Cricket Association da hap wow pyndam neidaw wa joor slap.
Kani ka yalehke hapyrdi ka WJH waka EKH da hap wow pynduna cha 12 Over chiliang heiwa ka EKH da jop ko ya ka kylla-khlem wei da jied ko wow Bat nyngkong wei da kamai ki 59/3, deiwa kamai boon dooh ka Sweetcemary Khongthiang (16 Run). Ka Sawakahi Syngkon (1/5), ka Linimandakini Ksoo (1/7) waka Sareeka Jat (1/25) toh kiwa yoh Wicket yaka WJH.
Ka Sawakahi Syngkon hawa Bat won da haap ko pyn ha ka bol wa ar ha ka Eliza Lyngdoh (1/9) tangwa ka WJH won da pynjop ya ka da ka Anastesia S Shullai (29 Not Out na 31 bol).
Ka WJH da poi thong ko deiwa yoh 60/1 na ki 8.2 Over.
