Ka Tura District Cricket Association da ye ko wow jop hadien wa chah pyntam ha ka Innings wa nyngkong yow jop ya ka West Jaiñtia Hills DCA da 35 Run yow psiah syndon cha ka Final ka U-15 Inter District Cricket Tournament 2023 ka Meghalaya Cricket Association’s ha Umbuda, Ri-Bhoi ynnin ka sngi.
Kam wow pynknymoo wa ka Tura da kamai ko da 125/10 ha ka Innings wa nyngkong heiwa ka WJH da ye ko wow pyntam da 27 Run deiwa kamai da 152. Ka Tura won hawa pteiñ ynnin da 24/0, da lai ko wow kamai 179 (All Out), iwa mut wa ka WJH emkaam ko 153 Run yow jop tangwa da ye ki wow kamai 117 Run deiwa haap lut waroh.
Ya ka TDCA da kamai boon dooh ha ka Innings wa ar da u Aritra Paul (37) wa u Agatchu Chetai K Marak (39) kiwa da kamai 75 Run neibynta ka Wicket wa nyngkong. U Ben Haden N Marak (40) wa u Trijal Agarwal (36) da kamai ki 64 Run neibynta ka Wicket wa le.
Kiwa kawang bol ka WJH da ye ki wow lehbha deiwa pynhaap ya 8 tylli ki Wicket kiwa chadien deiwa e du 27 Run. U Namewanki Pakyntein da yoh u 4/49 (waroh 9/75), u Maremdorkini Sutnga 3/23 wa u Eshan Siangshai 2/20.
Kiwa Bat ka WJH hawa kdong ya ka thong ym ye ki wow kamai chirup chirrup deilang deiwa smat haap ki Wicket heiwa u Maremdorkini Sutnga da kamai boon dooh u deiwa yoh 26 Run katwa u Namewanki Pakyntein da kamai u 21 Run.
Ka Tura da pynemkaam ko 4 ngut kiwa kawang bol heiwa waroh da lehbha ki wa kynthup ya u Manthan Gupta (3/19), u Kein Hagio R Marak (3/42), u Jamesbirth Ch Sangma (2/13) wa u Ben Haden (2/17). U Gupta uwa da yoh 5/36 ha ka Innings wa nyngkong, da yoh u waroh 8/55 wei da rah u leh yei naam Player of the Match.
Ya ka Final daw pynman hapyrdi ka Tura waka Shillong Cricket Association-A, kawa daw sdang ha ka 3 tarik u April.
