Ka Meghalaya dang emkaam ko sa 189 Run yow jop deiwa sah sa 4 Wicket ha ka Innings wa ar pyrchah ya ka Manipur ha ka U-19 Cooch Behar Trophy kawa daw poi cha ka sngi wa soo mynstep.
Ka yalehke da pteiñ ya ka sngi wa le ynne ha Bhubaneshwar heiwa ka Manipur da yoh chwa ko 203/6 ha ka Innings wa ar deiwa tam da 170 Run.
U Jotin Pheiroijam da pteiñ u neiwa ieh u ynnin ka sngi deiwa kamai sa 77 Run najrong iwa da yoh chwa u 101 Run ynnin ka sngi. Waroh da yoh u 30 tylli ki 4 Run wa 4 tylli ki 6 Run yow kamai 178 Run.
Da haap u ha u Manish Sharma, uwa men leh uwa lehbha dooh na kiwa kawang bol ka Meghalaya deiwa yoh 6/110 (waroh 8/165 ha kani ka yalehke) deiwa kawang 35.3 Over. U Raghav Magotra (2/69) wa u Rohit Yadav (1/22) toh kiwa da rap hoi ynne ka sngi.
Ka Manipur da dooh lut ko ya ki Wicket deiwa kamai 344 Run, iwa da booh ya ka Meghalaya da 312 Run ka thong yow jop.
Hadien wa neh slem da ka Bat, u Pheiroijam da wai u leh yei kawang bol ya ka Manipur, deiwa yoh ar Wicket na ki ar Over yow pynhaap ya kiwa sdang kamai Run ka Meghalaya, u Josiah Momin (13) da yaleh wow neh tangwa oo leh da haap u ha u Pheiroijam yow pynpoi ya ka Meghalaya da 14/3 iwi i por.
Ya ka Meghalaya da wan wow pynlait im da u Mrityunjay Bharali wa u Captain Kevin Christopher, kiwa da kamai 108 Run neibynta ka Wicket wa soo. U Christopher toh uwa rap khlan na kini tangwa hawa kut da yoh Run ki da jan katjooh hadooh wa haap u Bharali (47), ha u Pheiroijam hi.
U Christopher (52 Not Out) da neh u hadooh wa kut ka yalehke ynne ka sngi tangwa da dooh smat u sa arngut kiwa wan Bat lang wa oo, heiwa ka Meghalaya da pynkut ko ya ka yalehke da 123/6, deiwa em u loom wa heh wa hap ki wow ku mynstep yow ye u jop.
