U Symbood Montri Rangbah ka Meghalaya, u Sniawbhalang Dhar uwa man leh u Chairman ka Regional Committee on Interstate Border neibynta ka East Jaiñtia Hills ynne da man u kam u chongknor ha ka yalang ka Assam Meghalaya Boundary MOU heiyatoh wa u pood ka Ratacherra khamtam iwa yaktoh wow kynthup noh ya ka chnong Baikam cha Meghalaya.
Ha kani ka yalang da emlang u Deputy Commissioner ka East Jaiñtia Hills District, u Shivansh Awasthi, ka Additional Deputy Commissioner, East Jaiñtia Hills District, ka J.U. Kharpuri, u Superintendent of Police, East Jaiñtia Hills District, u Giri Prasad, u Sub-Divisional, u M. Kumar wa kiwi ki sahep sorkar wa ki heh ka chnong Baikam, Rattachera, Malidor wa ki paidbah ka chnong Baikam.
U Sniawbhalang hadien ka yalang da ong u wa ka chnong Baikam em ko 37 tylli ki manyung heiwa 30 tylli na ki kwah ki wow em wa ka Meghalaya.
Da ong u leh wa ynne ka yalang man ko ka rynsaan wa miat ya ka Regional Committee wei ki paidbah ka chnong leh da yoh ki wow pynsñiaw yeiwa kwah yong ki wei hadien ka yalang, ki Deputy Commissioner na East Jaiñtia Hills District wa uwa na Cachar District, Assam u yachem ko yow chim ka rai wa khaddooh.
Heiyatoh wa ki kaam pynroi ha ka chnong Baikam, u Sniawbhalang da ong u wa katni ki paidbah yoh myntoi ki na Meghalaya wa Assam kamtæ emkaam u raikut khnang wa ki paidbah u yoh myntoi ki na ki Scheme sorkar.
Neiliang u Shivansh Awasthi da pyntip u wa da yachem boonsien ha ki por wa dadep wa kynthup ya u Deputy Commissioner ka Cachar wow klam ya ki kaam wa sahteiñ ha chnong Baikam wei wow pynbait ya ki.
Discussion about this post