Ki waheh wasian ka Raid Nongtung wa haap ha Block-II, da phylla ki yei klam uwi na ki waheh ka Synjuk ki Nongsynshar Shnong ha khappood, u Blikshon Sohtun deiwa ong wa man iwa bakla wei iwa khlem yurim wow phah paan-maap ya u MLA ka Mawhati.
Neiliang u Blikshon dang ha ini wadep da dawa paan-maap u na u MLA ka Mawhati, u Dasakhiatbha Lamare hajrong i klam wa ymjooh em i kynaad wa ka Assam ha ka thaaiñ Block-II.
Hawa yaklam wa uwi na ki waheh ka thaaiñ u Johnas Shadap da ong u wa i klam u Blikshon toh iwa bakla wei dawa paan-maap toh iwa khlem yurim neibhah wa u Dasakhiatbha Lamare ym em bakla u.
Da ong u leh wa ha ki snem wa dadep ymjooh yoh u pynkrehkaam bha ya ki Scheme tangwa ha kini ki 3 snem waroh ki Scheme sorkar da ye wow pynkreh ya ki ha khappood, deiwa pynrap wa hanla em i sñiawthooh bakla tangwa emkaam wow pynbait yeitæ.
Heijooh i por da ong u wa u Dasakhiat da jooh klam u neipor cheipro heiyatoh wa i eh i khoo ki paidbah ha khappood wei da jooh lai yachem u leh ya ki paidbah, wei kam kiwa chong chnong ym em iwon iwon i pyrchah ya u MLA deiwa pynrap wa ki paibah ha khappood chongsuk ki.
