U Prime Minister Narendra Modi hawa e yei klam cha ki paidbah ka ri ynne ka sngi, nyngkong da e u ya ki kyntien sñiawlem ya kitu kiwa da dooh yei mynsien ha kani ka khlam wei da e u leh ya kiwa boon ki pynbna wa emkaam.
Hadien wa boon ki jylla da wan ki chkhmat wow pyrkhat deiwi ya i rukom e tika deiwa leh biang kamwa da leh chwa u Naisan, u Prime Minister da pynbna u wa 25% na ki tika wa da booh bhah ya ki jylla u chimkti noh da ka sorkar pyrdi India. Heiwa ya ini da e por ar tayaw ya ki jylla wow leh ki yeiwa emkaam.
U Prime Minister da pynbna u leh wa nadooh ka 21 tarik uni u bnai, ka sorkar India daw e mynkna ko ya i tika cha waroh kiwa chong chnong ka ri kiwa em 18 snem chaneiñ. Ka sorkar India daw thied ko 75% na waroh i dawai tika wa da pynmih iwa daw e mynkna cha ki jylla. Kamtæ ki jylla ym hap ki wow pynlut poisa wow thied tika.
Da khana u leh wa i booh 25% yow thied bait da ki Hospital ki bru samen ya i tika u pteiñ hi i. Ki sorkar jylla toh u pyntikna ki wa chim ki Hospital du T. 150 kam ka bai kreh namo ka Service Charge najrong i dor i tika wa da ya pynbait dor.
U Prime Minister da pynbna u leh wow pteiñ i e mynkna ya u khoo Pradhan Mantri Garib Kalyan Anna Yojna hadooh wa poi ka Deepawali. Ini mut wa hadooh u Khonchonglad (Nov), 80 klur ngut ki bru u yoh mynkna ki ya u khoo man-u-bnai.
Da ong u leh wa ha kini ki sngi daw pynboon chooh chooh yei pynmih ya i tika heiwa katni da em 7 tylli ki Company wa pynmih ya kiwa boon ki tika, wei i pyrchang (Trials) da em le tylli ki tika kiwa da lai ki chakhmat wei da em leh ar tylli kiwa neibynta wa iwi iwa e na khmut ‘Nasal Vaccine’ kiwa dang pynkreh katni.
U Prime Minister da maham u leh ya kitu kiwa pynpoor ya ka khubor thok pyrchah yei e tika neibhah ini da lehke ki yei mynsien ki bru wei toh u paitbniah yow yada na ini.
