Ka sorkar Meghalaya ynne ka sngi da pyntip ko wa dei wym yohsa wei yow ye u kdoh u khoom yei poor ka khlam COVID-19, da pynmih kyndon neibynta ka Shillong, Jowai wa Tura nadooh ka 01-05-21 nadooh 5 waje i step hadooh ka 10-05-21 ka wow kut heipor 5 waje i step iwa man 10 sngi wow khang ya ki thaw puræ, ki dukan, i lai i wan wa kiwi kiwi.
Da ong leh wa neidaw wa kiwa dang yoh ya uni u khñiang ku ki man-ka-sng, heiwa ynne da em 159 ngut kiwa dang yoh, kamtæ da emkaam wow pynmih ki kyndon yow khang yei poor ka khlam.
Neiliang ka sorkar ym em pynemkaam ko yei ktien Lockdown deiwa ong “Containment Measures” tangwa ha kini ki 10 sngi ym chah u pynman ya kiwon kiwon ki jait yalang paidbah lait na ki bia lane lada em i yap bru kiwa daw pynbait da ki jar jiar ki DC.
Ym chah wow pynman ya kiwon kiwon ki jait yalehke Sport wei yei lai i wan iwa ym toh iwa emkaam.
Waroh ki thaw puræ u khang ki ha kini ki 10 sngi kamjooh ki yung krehkaam ki bru samen, u khang leh ya ki yung krehkaam sorkar ka sorkar pyrdi kiwa ym em man kam kiwa emkaam.
Ki dukan wa dai ya ki mar wa emkaam man-ka-sngi u wai hi ki iwa daw pynbait da ki DC kamjooh ki kaam chna yung wa kiwi, ki dukan Hardware, ki dukan chna Mobile, ki karkhana chna kari heiwa yei rukom wai daw pyntip da ki DC.
Ki Bank leh u man ki kiwa wai katwa ki kari kamai kamjooh ki kari paidbah daw hap u pynduna ki.
I lai hapoh ki District wa i lai cha kiwi ki District kam cha Shillong, Jowai wa Tura daw khang deiwa booh da ki kyndon wei emkaam wow yoh bor na ki DC.
Ym em khang yei lai i wan deiwa ye u pynsakhiat wei deiwa bood ya ki kyndon kam ki kaam wa yatoh wa ka rep ka riang, i ri mrad, i kit ya ki mar wa emkaam, kiwa lai yaleh Exam kamjooh kiwa sikai wa em ha ka Exam, kiwa lai booh mar wa kiwa leh Home Delivery e-Commerce, ki bru wa da yoh bor, ki bru wa em ha ki kaam chna yung wa kiwi ki jait chna, ki bru wa lai yei kaam sorkar, ki bru chipai, NEEPCO, MeECL, DIPR, ki wakreh Bank wa Post Office.
Neibynta won waroh kawi ka jylla ym chah wow pynman ya kiwon kiwon ki yalang paidbah nadooh ka 1-10 tarik u Naisan. U khang leh ya waroh ki khayi pateiñ wa kiwi ki ri, i pynman ya ki yalehke Sports wei ki DC hap ki wow pynbait yei pynman ya ki yaw cha ki thaaiñ nongkyndong.
